Correoseko zuzendaritzak posta zerbitzua areagotu nahi duela salatu du ELAk
ELA sindikatuak eskatu du "funtsezkoa ez den jarduera oro eteteko, eta, beraz, Correosen jarduera Posta Zerbitzu Unibertsalera mugatzea, ahalik eta langilerik txikienarekin, langileen %25ekin". Aldiz, Correosen zuzendaritza aurkako norabidean pausoak eman nahian ari dela salatu du sindikatuak, "Posta Zerbitzu Unibertsalaz gain, jakinarazpenak eta paketeak ere banatzen saiatzen da".
Hauxe da ELAk bere webgunean adierazi duena: "Correosek berriki egin diren araudi-aldaketak baliatu nahi ditu banaketa areagotzeko, postetxeko langileen zein herritarren osasunarekiko arduragabekeria izugarrian. Mugikortasuna murriztu eta birusaren hedapena geldiarazi ahal izateko martxoaren 29ko 10/2020 Errege Dekretua argitaratu ondoren, Correoseko Zuzendaritzak posta-jarduera areagotu nahi du. Posta Zerbitzu Unibertsalaz gain, jakinarazpenak eta paketeak ere banatzen saiatzen da; argitaratutako araudiaren aldaketa alde batera utzita".
ELAk Correosen "arduragabekeria" salatu du, "bere langileak eta herritar guztiak COViD-19 kutsatzeko arriskuan jartzen dituelako". Correosi eskatu dio "langileen eta herritarren osasuna lehenestea, enpresaren interes ekonomikoaren aurrean".
