Britainia Handian COVID-19 pandemiaren bigarren erasoaren kontrola galtzeko zorian –eta Brexita egia bihurtzeko bezperetan– Boris Johnsonen gobernuak ekin dio Oxfordeko Unibertsitateak eta AstraZeneca multinazionalak garatutako txertoa ezartzeari. Aurretik britainiarrak erabiltzen ari baldin baziren –Europar Batasuneko gainerako herrialdeak bezala– Pfizer/BioNTechena, europarrei aurrea hartu diete beren bigarren txerto aukera baimentzerakoan. 

Gobernu britainiarrak 100 milioi dosi ditu kontratatuta multinazionalarekin, eta datozen egunetan lehen lau milioiak jasotzea espero du. Aipagarria da AstraZenekaren txertoak ez duela behar Pfizerrenak bezain logistika konplikaturik kontserbatzeko eta banatzeko. Azken hau, -70ºC-tako tenperaturan kontserbatu behar da, ultraizoztua, eta ohiko errefrigerazio batean eraginkortasuna soilik hiru egun pasatxoz mantentzen du. Aldiz, AstraZenecarena bi eta zortzi gradu arteko tenperaturan gorde daiteke, horrek azpiegitura eta kosteetan dauzkan abantailekin.

Oxford/AstraZenecarena, ordea, ezingo da banatu Europar Batasunean. Hala adierazi du Sendagaien Europako Agentziaren zuzendari exekutibo Noel Wathionek: "Oraindik ez digute baimen eskaerarik aurkeztu. Ezta baldintzapeko marketin-lizentzia bermatzeko adina ere. Txertoaren kalitateari buruzko datu gehiago behar ditugu. Eta, horren ondoren, enpresak eskaera formal bat aurkeztu behar du". Beraz, ziurtzat jo daiteke otsaila baino lehen ez dela txerto hori egongo EBko herritarren eskueran.

Aldiz, Europar Batasuneko bigarren txerto bihurtzeko aukerak dauzka Moderna konpainiarenak. Jadanik AEBetan baimendu eta kopuru handietan erabiltzen ari diren honen dossierrari erantzuna urtarrilaren 6an eman behar dio Sendagaien Europako Agentziak eta gehienek segurtzat jotzen dute argi berdea piztuko diola.

Europako Batzordeak informatu duenez, baimenetan atzera dabilen AstraZenecarena da Europak kopuru handienean erosi duena: 400 milioi dosi dauzka kontratatuta, 200 milioi herritar immunizatzeko adina (osoki eraginkorra izateko bi dosi behar ditu bakoitzak). Pfizer/BioNTechi 300 milioi dosi erosi dizkio eta Modernari 160 milioi.

Txertoen arteko ezberdintasunen artean –daukaten osagai biologikoetan eta eskatzen dituzten logistikazko azpiegituretan dauzkaten aldeez gain– prezioetan ere oso ezberdinak dira. Jada Euskal Herrian ezartzen ari diren Pfizer/BioNTechena 19,5 dolar kostatzen da dosia (beti ere denboran tartekatutako bi injekzioak kontutan hartuta, beste txertoetan bezala), Modernarena 32 euro eta AstraZenekarena 3-4 euro.