LABI aholku batzordeak koronabirusak eragindako egoera epidemiologikoa aztertu ondotik, pasa den larunbatean Eusko Jaurlaritzak hainbat neurri iragarri zituen, xede zutenak pertsonen pilaketak eta mugikortasuna gehiago mugatzea. Neurri sorta horren baitan aurreikusten zen bilkurak sei lagunetara mugatzea, arlo publikoan zein pribatuan.

EAEko Justizia Auzitegi Nagusiak erabaki horiek onartzeko zain zegoen Jaurlaritza, neurriak Euskal Herriko Agintaritzaren Aldizkarian (EHAA) argitaratu eta indarrean jartzeko. Alabaina, auzitegiak atzera bota du bilerak sei lagunetara mugatzeko neurria.

Auzitegi Nagusiaren aburuz, oinarrizko eskubideak urratzen dituen neurria da. Hargatik, Jaurlaritzak herritarrei gomendatu diezaieke sei lagunetik gorako taldeetan ez biltzea, baina irizpide hori betetzera ezingo ditu derrigortu herritarrak.