ARGIA.eus

2020ko apirilaren 09a

Belgikan gobernuak milioika larrialdi-maskara harrika bota zituen 2019an

  • Belgikan, Europako beste herrialde askotan bezala, tartean Euskal Herrian, babes maskarak ezin eskuratuan desesperatzen dira koronabirusaren kontrako lanean ari diren profesional eta boluntarioak. Aurreikuspen faltagatik? Belgikan ikusi denez, politika neoliberalek muturreraino eraman dituzte osasungintzan ezarritako murrizketak eta orain dagokigu ondorioak pagatzea: Belgikak maskara stock handia zeukan, milioika batzuetakoa, baina 2019an suntsitzea erabaki zuen gobernuak horien ordez berririk erosi eta metatu barik.

Pello Zubiria Kamino @pellozubiria
2020ko martxoaren 26a
Babes maskarak zamatzen Liejako portuan. (Argazkia: Belga)

Belgikako Irrati Telebista publikoak plazaratu duenez, gaur Belgikan Covid-19ari aurre egiteko inondik eskuratu ezin dituzten maskarak bezalakoetatik, efikazia handikoak, milioika zeuzkan gobernuak eta 2019ko otsailean suntsitu egin zituen, Osasunerako Mundu Erakundeak ezarritako irizpideei amore eman gabe. Hamabi hilabete geroago, alferrik galdutako haien faltan, korrika eta presaka ibili da mundu osoan aztarrika Maggye De Block osasun ministro flamandarra, tartean hanka-sartze galantak eginez: Turkian erositako batzuk ez ziren Belgikaraino iritsi iruzur bat tarteko, Txinatik urgentziaz ekarritakoak kalitate txarrekoak atera zaizkie...

Belgikak 2019 hasieran suntsitzera eramandako milioika maskara haiek erreserba estrategiko bat osatzen zuten, FFP2 tipokoak ziren, isolatzeko gaitasun handiena daukatenak. Belgikako Irrati Telebista publikoak iturri fidagarritzat erabili duen Le Vif magazinean Nicolas De Decker kazetariak azaldu duenez, Belgikaren stock estrategiko horretan betidanik zeuden milioika batzuk maskara. 2006an Osasun ministro Rudy Demotte zenean, kirurgiarako 32 milioi maskara eta FFP2 bereziki isolatzaileetatik beste 6 milioi erosi zituen gobernuak. Eta biltegi hori 2009an eguneratu eta berritu zuten A/H1N1 hegazti gripearen mehatxua zabaldu zenean, 9 milioiko kostez. Gaur egun presaka eta muturka gastatu beharrak diren dirutzen aldean irrigarria dirudite orduko 9 milioi haiek baina...

Maskara mordo hura guztia suak suntsitu zuen 2019an. Edo 2017an... kazetariek –Belgikako Arriskuen Kudeaketa Batzordearen bilkura baten aktaren kopia erakutsiz– aipatu duten data eztabaidatzea baizik ez baitzaio iruditu Maggie De Block egungo Osasun ministro liberalari. "Metatutako stock hori iraungitze datara iritsia zen eta joan den urtean suntsitua izan da" irakur daiteke larrialdi batzordearen aktan, zalantzak uxatzeko moduan. Hala ere, dio ministroak: "Stock hori Defentsa ministerioak zeukan bilduta baina ez baldintza onetan. Maskarak erabil ezinak ziren eta 2017an izan ziren suntsituak". De Block ikasketaz familiako medikua da.

Maggie De Block mediku eta politikari flamandar liberala, Belgikako Osasun ministroa.

2017ko data hori egia balitz ere, kontua da geroztik hiru urte pasatu arren Belgikako Gobernuak ez zuela antolatu babes maskarazko biltegi berririk. "Eten gabe berrituz joango zen stock bat antolatu nahi genuen, eten gabe stockaren zati bat saldu eta biltegia berritzeko, gordetako tresneria iraungi ez zedin", desenkusatu da ministroa. Egia izan ala aitzakia, zezenak ez baina Txinatik etorritako Covid-19 dragoi txikiak harrapatu du Bruselasko gobernu neoliberala, Europako beste batzuk bezala. Horren aurretik agintariok ezarria baitzuten –oroitarazi du Nicolas De Deckerrek– arau zorrotza estatuaren aurrekontuetan: Osasungintzarako aurrekontua urtean ezin zen hazi %1,5 baino gehiago: "Hazkunde hori ez zen iristen osasungintzako profesionalek beharrezkotzat jotzen duten mailara eta, hori gutxi balitz, urtero ez ziren %1,5eko hazkunde horretara ere iritsi".

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Koronabirusa  |  Murrizketak  |  Belgika

Koronabirusa kanaletik interesatuko zaizu...
Azkenak
EGILEA
Argia buletina
Egunaren laburpena
zure e-postan
Eguneraketa berriak daude