Hiru fasetan eginen da deskonfinamendua Ipar Euskal Herrian eta orokorki Frantziako Estatuan: abenduaren 15a arte iraunen du konfinamenduak –betebeharrak arinduz–, eta egun horretatik goiti etxeratze agindua ezarriko dute 21:00tan –ez du zehaztu noiz arte– eta azkenik, beste malgutze batzuk etorriko dira urtarrilaren 20tik aurrera –osasun egoerak ahalbidetzen badu–.

Zehazkiago, konfinamenduak segituko du abenduaren 15a arte baina era arinagoan: orain arte egunean ordu batez eta etxetik kilometro batetara ateratzeko baimena baldin badute herritarrek, larunbatetik aurrera hiru orduz ateratzen ahalko dira 20 kilometroko eremuan. Bestalde, azaroaren 28tik goiti komertzioek ateak irekitzen ahalko dituzte gaueko 21:00ak arte. Eskolaz kanpoko aktibitateak ere berriz abiatzen ahalko dira, kanpoan egiten badira, eta otoitz lekuak ere irekiko dituzte, gehienik 30 lagun batzeko baldintzapean.

Ondotik, abenduaren 15etik aurrera, 21:00tan finkaturiko etxeratze aginduak ordezkatuko du konfinamendua eta hori Macronek ez du zehaztu noiz arte. Hala ere baldintza baten pean kenduko dute konfinamendua: kutsatuen kopurua egunean 5.000 baino ttipiagoa baldin bada. "Arduratsuki" jokatzeko deia luzatu die herritarrei presidenteak, zehaztuz hirugarren olatu bat saihesteko erronka denen esku dela. Hala ere, eguberriko familia bazkariak baimenduak izanen dira, eta hori jende kopurua mugatu gabe. Hor ere arduratsuki jokatzeko deia egin die: gelak airestatu, distantziak zaindu eta beste. Abenduaren 24 eta 31 gauetan etxeratze agindurik ez da izanen baina ezingo da espazio publikoan egon.

Kontzertu gelak, museoak, zinema gelak ere irekitzen ahalko dituzte, babes-neurriak errespetatuz. Jende metaketa handiko ekitaldi kulturalak ez dira baimenduak izango.

Haatik, jatetxe, diskoteka zein tabernek hetsirik segitu beharko dute eta hori urtarrilaren 20a arte guttienez. Egunean 5.000 kutsatze baino gehiago baldin badira ezingo dituzte ireki. Sektore horretakoek egin beharreko "sakrifikazioez" kontziente dela erranik, Frantziako Gobernuak laguntza bideratuko diela segurtatu du: edo 10.000 euroko laguntza edo 2019 urteko negozioaren %20, enpresa bakoitzak aukeratzen ahalko du nahi duena.

Azken fasea urtarrilaren 20tik aurrerakoa izanen da: lizeoak modu presentzialean irekiko dituzte eta otsailaren 4tik aurrera unibertsitateak. Kirol gelak ere irekitzen ahalko dira.

"Orain arte bezala", COVID-19ak eragindako krisi sozial eta ekonomikoari aurre egiteko laguntzak egonen direla zehaztu du Macronek.

Txertoa ez dute behartuko

Txertoari buruzko informazioak ere eman ditu Frantziako presidenteak. Hau ez da behartua izango. Txertatze kanpaina bi fasetan izanen da: abendu bukaeran lehenik eta ondotik 2021eko udaberrian eta lehentasuna ukanen dute pertsona zaurgarrienek eta adinduek. Txerto bat baino gehiago izango dira aukeran. Txertoaren segipena egiteko komite zientifiko bat osatuko du gobernuak eta horrez gain, herritar kolektibo bat ere osatuko dute, hurbileko jarraipena egiteko.

Testen garrantzia ere azpimarratu du, kutsatuekin kontaktuan egondakoen jarraipenaren inportantzia azalduz ere. Hori horrela, telefono bidez segipena bideratzen duen Tous Anti Covid aplikazioa erabiltzea eskatu die herritarrei –baita komertzioei ere–.

Egondako "akatsak" ere aipatu ditu: "burokrazia gehiegi", "ekoizpenerako burujabetza eskasegia" ala beste. Egoera gogorra baldin bada ere "etsipena" eta "kexua" sentimenduei lekurik ez uztea galdetu die herritarrei.