Kutsatuen kopuruak beherantz jarraitzen du Italian, astelehenean 3.153 kasu berri detektatu dira. Zaintza Intentsiboko Unitateen beharra izan duten pazienteen zenbakia ere apalagoa da aurreko egunetan baino, astelehenean 83 lagun gutxiagok behar izan baitzuten horrelako arretarik Italia osoan.

Gianni Rezzak, Italiako Osasun Institutu Nagusiko bozeramaileak, azaldu du heriotza kopuru altuago horrek ez duela esan nahi egoerak okerrera egin duenik, duela 20 egun kutsatutako jendea izan baitaiteke. “Konfinamenduaren ondoren senideen arteko transmisioa gerta daiteke oraindik eta kontuan izan behar da inkubazio-epea ere”, azaldu du astelehenean, egunero prentsaren aurrean egiten duen agerraldian.

Norbait kutsatzen denetik gaixotasuna detektatzen den arteko epea da kontuan hartu beharreko aldagaietako bat. Kutsatutako pertsona batzuen egoera larritu eta hil arteko epea berriz, beste bat. Horregatik, Rezzaren ustez, lehenbizi kutsatutakoen kasuak jaitsiko dira eta heriotzenak ondoren.

Italian 160.000 lagun inguruk esan dezakete birusa hartu dutela. 35.500 inguru sendatu dira, 100.000 baino gehiago oraindik kasu positiboak dira.

Fase berria Italian

Astearte honetatik aurrera, Italia koronabirusaren aurkako neurrien fase berri batean sartuko da. Erdibideko fasea izango da, maiatzaren 3an konfinamendu-baldintzak lasaitzen hasi aurretik. Momentuz, aste honetan supermerkatu, janari-denda, farmazia, banku eta postetxeez gain, beste negozio batzuk ere ireki ahal izango dira.

Gobernuak aukera eman du, besteak beste, liburu-dendak, paper-dendak eta haurrentzako arropa dendak irekitzeko. Beste jarduera batzuk ere baimendu ditu, hala nola basogintzakoak, ordenagailuen ekoizpena eta enpresetan lan egiten duten zinpeko zaindariena edo garbiketa- eta desinfekzio-zerbitzuetako langileena.

Negozio horiek berriz martxan jartzeko baimenak debate handia eragin du Italian eta, adibidez, Lombardian eta Piamonten –Covid-19an oso gogor kolpatu dituen bi eskualde– maiatzaren 3ra arte liburu-dendak eta paper-dendak ez dituzte irekiko.