2.000 lagun baino gehiagok egin dute bat Guardianeko enpresa batzordeak eta SOS Aiaraldea plataformak deituriko mobilizazioan. Altzarrate futbol zelaitik abiatu den giza-kate jendetsuak lantegia inguratu eta irmo salatu du Guardianen itxiera.
Mobilizazio historikoa
Azken hamarkadetako mobilizazio jendetsuenetakoa izan da gaur Laudiok bizitakoa. Txiki geratu dira Guardianen perimetroa inguratzen duten bi kilometroak. Giza-katea Altzarrateko zubira iritsi den unean, manifestazio jendetsu bilakatu da.
Egunotan herritar eta medio guztien ahotan egon den labearen itzaltzea ere oso presente egon da mobilizazioak egin duen ibilbide guztian. "Labea ez dago matxuratuta, hondatu egin dute!", ozen oihukatu dute beharginek. Izan ere, multinazionalaren hasierako asmoei jarraituz, barruan zuen beira kendu gabe utzi dute labea itzaltzen, azpiegitura erabilgaitz utziz, sindikatuek salatu dutenez. Eusko Jaurlaritzak erabaki horretan izan duen papera behin eta berriz salatu dute manifestazioan.
Guardianeko langileek emozionatuta eskertu dute azken egunetan jaso duten herritarren babes beroa: "Egun gogorrak izaten ari dira, baina gaurkoa izugarria izan da. Eskerrik asko", aldarrrikatu dute Herriko Plazan hitzartzea hasi berritan.
Jaurlaritzaren papera: "amorragarria eta arduragabea"
Kritiko mintzatu dira Guardianeko langileak, Herriko Plazan elkartutako milaka lagunen aurrean. "Gardentasun faltak eta improbisazioak" inguratzen dute Guardianen itxiera, Enpresa Batzordeko kideen iritziz. "Zuzendaritzak jarduera etetea eta enplegua suntsitzea ekidin zezaketen alternatibak baloratu gabe itxi du lantegia. Enpresak hainbat bileratan aitortu digu erabaki hori ez dela labearen matxuragatik hartu, Laudioko lantegian interesik ez dutelako baizik".
Mesfidati dira ere Eusko Jaurlaritzak "balizko inbertsoreei" buruz zabaldutako berrien inguruan. "Amorragarria eta arduragabea iruditzen zaigu komunikabideetan ustezko gestio horiek iragartzen aritzea, egoera honetan zuzenean parte hartzen dutenak alde batera utziz. Jendearen bizitza da jokoan dagoena, eta ez hori bakarrik, baita aurretik inolako ondoriorik gabe suntsitu diren lanpostuak ere, orain eta etorkizunerako jokoan daudenak", adierazi dute batzordeko ordezkariek.
Argazkiak: Aimar Gutierrez Bidarte eta Naia Vallejo Alonso
