Urtarrilean eseri zen epailearen aurrean Iñaki Badiola Realeko presidentea eta apirilaren amaieran heldu da behin betikoa ez den ebazpena. Fiskaltzak 66 urteko espetxe zigorra eskatu zuen berarentzat, Gipuzkoako politikari, epaile eta kazetarien aurkako ustezko irain eta kalumniengatik, eta hala izan zela dio epaiak. Guztira, hamar urte eta zortzi hilabeteko zigorra ezarri dio Donostiako Zigor Auzitegiak, zortzi kondenatan banatuta. Horiengatik, 180.000 euroko zigor ekonomikoa jasoko du Badiolak, eta indemnizazioetan 175.000 euro ordaindu beharko ditu.

Fiskaltzak eskatzen zituen 66 urteko espetxe zigorretik oso urrun dago ebazpena. Indemnizazio eta zigorretan, berriz, ia 3 milioi euroko kantitatea eskatzen zuen.