Testuingurua ematearren, Guardia Zibilak punk kontzertu baten kartelen harira leporatu dizue gorrotozko delitua, irainak koroari eta terrorismoa goratzea.

Kerman: Bai, hala da. Santiago Abascalen, Koroaren eta Guardia Zibilaren kontra, nagusiki.

Deborah: Zu oraindik Auzitegi Nazionalean zaude kartel baten ondorioz.

Kerman: Bai, lehenik eta behin Auzitegi Probintzialak absolbitu nau, baina Auzitegi Nazionalak berriro salatu nau kartel bat dela medio.

Zein da zuen egoera une hauetan?

Kerman: Hasierako epaiketari dagokionez, ez gaude akusatuak, ez dugulako harremanik, baina ez gaituzte bakean utzi. Uste nuen bakarrik deklaratzeko deitu ahal nindutela, baina oraindik ere ikertzen ari dira salatutako beste kartel bat.

Dena den, salaketa nola sortu zen?

Kerman: Santiago Abascal Voxeko presidenteak berak salatu zituen kartelak eta ikusita absolbitu nautela, berriro salatu nau, ez bere aurka ezer egiteagatik, baizik eta Koroaren kontrako irainengatik. Urtebete daramagu epaiketa hauekin eta, egia esanda, burua apur bat gainezka daukat jadanik. Izan ere, uste nuen aske ginela, baina ez.

Deborah: Ni epaiketatik kanpo nago, baina badago jende gehiago salatuta, Insonoro musika webgunekoak, adibidez.

Eta hau guztia 2023an hasi zen.

Kerman: Bai, hau 2023ko udan hedabidetan zabaldu zen. Santiago Abascalek salatu zuen bere irudiarekin egindako kartel batzuk agertu zirela punk kontzertu bat sustatzeko. Guk duela 20 urte baino gehiago antolatzen dugu Kallejeros Fest, eta beste pertsona batzuek egin dute bi urtez antzeko ekimen bat. Eurek zabaldu zuten kartela eta Guardia Zibilak guri leporatu zigun egin izana.

Zer agertzen da kartelean?

Kerman: Santiago Abascal John Fitzgerald Kennedy izango balitz bezala Dallaseko atentatuan.

Eta horren ondorioz sekulako ikerketa abiatu zuen Guardia Zibilak.

Kerman: Urtebetez aritu ziren ikertzen.

Deborah: Berez, ikerketak iraun zuen sei hilabete. Gure bila aritu ziren sare sozialetan.

Kerman: Bai, luze ikertu dute.

Hain zuzen, Auzitegi Nazionalak Udaltzaingoari, Ertzaintzari, Polizia Nazionalari eta Guardia Zibilari agindu zien kartelak ikertzea.

Deborah: Ertzaintza agertu zen kontzertuaren lekuan, baina Guardia Zibilak bideoak eskatu zituen. Bideo horiek Arriaga Antzokiko kamerek hartuak dira eta irudietan Kaskagorri agertzen da. Guk egiten ditugun kontzertuak ez dira han, baizik eta Kaskagorri eta Bilborock artean. Hortaz, uste dute gu Kaskagorri garela.

Kerman: Kontzertuak direnean, oro har, udaltzainak daude, baina salaketa jarri zuten urtean Ertzaintza egon zen, horregatik, hain zuzen.

Deborah: Hasteko, euren artean kontraesanean daude. Ertzaintzak dio ez zela kontzerturik egon eta Guardia Zibilak bai, Kaskagorriko irudiak baliatuta.

Aipatu duzue Ertzaintza bertaratu zela eta ziurtatu zela ez zela kontzerturik egon, baina Guardia Zibilak askoz harago eraman du ikerketa eta beste kartel batzuk bilatu ditu.

Kerman: Guk antolatzen ez dugun jaialdiak bi urtez atera ditu Santiago Abascalen eta Erregearen kartelak eta hori ez zaio eskuinari gustatu. Ikusita Abascalen kartelarekin ezin zigutela epaitu, aurreko urteko kartela ere leporatu ziguten.

Deborah: Eta ez hori bakarrik, gure Instagram kontuetan dauden kartel guztiak ere. Guardia Zibilarena, Erregearena… guztiak. Guk azaldu genien guk egindakoek gure sinadura -gure logoa- dutela, besteak zabaltzen ditugu. Zabalpen hutsa da.

Orduan logoak dituztenak salatu zituzten.

Deborah: Bai, nik egin nuen bat zeinean agertzen ziren Guardia Zibileko bi agente -emakumezkoak- eta “We are all prostitutes” lema. Abesti punk bat da eta kapitalismoaren izaeraren salaketa da, guztiok prostituitzen gara, nik ere lan egin dut hiru euroren truke ordua.

Kerman: Guztiok gara prostitutak.

Deborah: Aurretik bazegoen salaketa publikoa kartelen kontra Bilboko alkateari bideratuta, eta guk esan genuenean kartelak gureak zirela, epaitegira jo zuten. Deklarazioa egin eta astebetera salatu ninduten. Hala ere, ez zen gorrotozko delitu bat. Delitu hori gutxiengoen kontra egindakoa da eta Guardia Zibila ez da gutxiengo sozial bat. Hala ere, Santiago Abascalek bere gain hartu du gure aurka egitea.

Kerman: Ahalik eta gehien izorratzen saiatzen ari da. Egia esanda, zorte izugarria izan dugu abokatuek modu politiko eta boluntarioan lagundu gaituztelako, baina zorte hori ez bagenu izan, prozesu hau guztia sekulako dirutza litzateke edo okerrago, espetxean amaituko genukeen Lau aldiz joan gara epaitegira.

Guardia Zibilaren ikerketa oso urrun heldu da, ezta? Gehienbat ustezko delituak eta jarri dituzten bitartekoak alderatuta.

Kerman: Bai, diagrama bat sortu dute zeinean nire argazkia agertzen den, baita Deborah ere, eta gezien bidez nire musika taldeak, ETAko kideak izango bagina bezala. Horretarako Internet eta sare sozialak arakatu dituzte. Bitarteko nahiko bideratu dituzte honetara. Ni erroldatuta nago Aretan, han bizi izan naizelako urte luzez, baina Bilbon bizi naiz orain, eta bazekiten hori. Horrek esan nahi du jarraitu gaituztela fisikoki. Gu ez gara konturatu, hori bai. Gainera, Dublinera jo zuten Metari informazioa eskatzeko. Gure IP-en identitateak exijitu zituzten.

Deborah: Instagramek erantzun zuen ezetz, baina gero nik neukan Skype kontu baten bidez atera zituzten izen-abizenak.

Kerman: Hori ez zen guztia izan, eskatu zuten baimena gure etxebizitzetan sartzeko eta gure gailu elektronikoak eramateko: ordenagailuak, disko gogorrak… Gureak zein gure etxean bizi direnenak. Zorionez ezezkoa eman zieten, baina kontrakoa gerta zitekeen.

Orduan, zorte ona izan duzue, gainera?

Deborah: Bai, Castellón epaileren esku geratu behar zen epaiketa.

Kerman: Oso ezaguna da eskuin muturrekoa delako.

Deborah: Zorionez, Castellón epailearen oporretan heldu zen kasua Auzitegi Nazionalera. Beste epaile batek jaso zuen eta erabaki zuen Bilboko epaitegien eskumena zela. Gu horren guztiaren berri izan dugu behin dena igaro denean, baina sekulako arazoetan egon gintezkeen.

Kerman: Zitazioa heldu arte, ez gara honen jakitun izan. Bere garaian jende askok aipatu zidan albistea, baina geroztik ez genekien ezer. Antolatzaileek ez zuten kontzertua egin eta urtebete geroago heldu zitzaigun guztia.

Esan dizuete zenbat urteko kartzela zigorra eskatu nahi zizueten?

Deborah: Gutxienez lau. ETAko kideak izango bagina epaitu nahi gintuzten! Esango nuke guztira zortzi urte zirela. Suposatzen dut jendea kikiltzeko saiakera dela.

Kerman: Guk gure kontzertuak antolatzea edo ez ez die eragiten ez Vox, ez Santiago Abascali, baina izorratu nahi dute. Ez da bakarrik gure aurka. Harremanetan jarri gara Valladolideko neska batzuekin margotu zituztelako Santiago Abascalen aurpegi batzuk puntu gorri batekin buruan eta salatu ditu. Antisistemak edo antifaxistak salatzera bideratzen du bere jarduera.

Berez, uneren batean saiatu dira lotze kartel hori egitea ETArekin.

Deborah: Bai, esan dute Kaskagorrikoak garela txostenean. Eurek euren presoen argazkiak dituzte eta guri ETAko abestiak kantatzea leporatu digute. Dena ikertu dute Madrilgo bulego batetik.

Kerman: Hemengoa izanez gero, agerikoa da gu ez garela Kaskagorrikoak, zer den Bilboko Konpartsa bat eta zer jaialdi punk bat, baina Madrilgo batek ez daki. Horrela, aipatu zuten euskal preso batek irakurri zuela pregoi bat Kaskagorrin eta guri egotzi digute, baina Madrilen sinetsi dute.

Ikara ez zen txikia izango horren guztiaren berri izatean.

Kerman: Ikara ez, ni koherente naiz eta zerbait egin badut, onartzen dut, baina kasu honetan ez. Nik Kallejeros jaialdia antolatzen dut, ez bestea.

Deborah: Egia da gure jaialdia ere izan zitekeela, kutsu antifaxista duelako, baina horrelako zigor eskaerak kartel bat egiteagatik, iruditzen zait penagarria. Suposatzen dut Voxek estatuaren finantzazioa jasotzen duenez, ez duela ezer hoberik egiteko, abokatuen bitartez salatzen gaituzte eta guk horri aurre egin behar diogu.

Orain arte zer eragin dizue prozesuak?

Kerman: Gehienbat estresa eta antsietatea eta etsipen apur bat kartel horren egileekin, ez baitute aurpegia eman.

Hala ere, bidea ez da erraza izan.

Kerman: Ez, helegitea jarri zuten, ez zeudelako ados Bilbora mugitzeko erabakiarekin eta ez zieten onartu. Gero beste salaketa bat jarri zuten eta Auzitegi Nazionalean deklaratu behar izan genuen berriro, eta baztertu zuten epaiketa egitea.

Deborah: Dena den, ematen du behin eta berriro salatuko dutela euren sokako epaile batekin jo arte. Orain arte zorte ona izan dugu eta Bilboko epaileak zentzudunak izan dira, baina auskalo.

Kerman: Madrilen deklaratu genuenean nire abokatuak esan zidan argitzeko bakarrik erantzungo nituela bere galderak. Epaileak irribarretsu begiratu zion akusazioaren abokatuari, konplizitate osoa erakutsita. Ez zuten izan inolako disimulurik.

Prozesua ez da amaitu.

Kerman: Ez, lau lagun salatu zituzten, gu biok eta Insonoro webguneko arduradunak. Eurek kontzertuen berri ematen dute eta kartela argitaratzen lehenengoak izan zirenez, oraindik prozesuaren barruan daude.

Deborah: Musikari lotutako elkarrizketak egiten dituzte eta kartelen zabalpena. Salaketaren kartela plazaratu zuten egunean beste 30 kartel igo zituzten.

Eta zuek nola lortu duzue absolbituak izatea prozedura horretan?

Kerman: Kartel horiek eta guk egiten ditugunak ikustea nahikoa da sumatzeko marrazteko modua, irudia osatzeko era eta sinadura ezberdinak direla. Gure jaialdia da Kallejeros eta besteena Callejeros eta bien artean dagoen lotura bakarra da bietan agertzen dela DIY lema. DIY (Do It Yourself) leloa punkaren filosofiako da; egin ezazu zuk zeuk.

Eraman nituen nik egindako 26 kartelak eta agerikoa zen letra eta marrazki mota bera zutela, ez salatutakoak bezala.

Bizi izandako guztiaren ostean, zein da zuen jarrera?

Kerman: Honekin guztiarekin gure izpirituaren kontra egin nahi izan badute, oker daude. Kallejeros jaialdia egiten jarraituko dugu. Antifaxismoa beti!

Deborah: Gainera, babes handia jaso dugu eta lagundu gaituzte. Duela gutxi Zaragozako mutil bat salatu du Abascalek. Nik uste dut guztion artean batu behar garela honi aurre egiteko.

Kerman: Gure aitonak lubakietan borrokatu ziren faxismoaren kontra, guk beste modu batean egin beharko dugu.