Tosu Betirako: "Ez gaude bakarrik, elkartasuna sentitzen dugu"

  • Abuztuaren 31tik erresistentzia kanpaldia egiten ari dira Tosu Betirako asanbladako kideak Ibarbengoako metro geltokiaren inguruan, Getxon, aparkaleku erraldoia egin dezatela eragotzi nahian. Ertzaintza eurak botatzera noiz etorriko zain, astez aste doaz musika, hitzaldi eta bestelako jarduerez osatutako egitaraua osatzen. Datozen egunetan gerta daitekeenaz berba egin dute gurekin.

Unai Brea @unaibrea
2017ko irailaren 13a
Batez beste hamabost lagun izan dira gauero lotan Tosuko erresistentzia kanpaldian, askoz gehiago egunez antolatutako ekitaldietan. (Arg.: Unai Brea)

Aspaldi igaro zen Bizkaiko Garraio Partzuergoaren agendan Ibarbengoako aparkalekua eraikitzen hasteko gorriz azpimarratuta zegoen lehen data. Tosu Betirakok zelaia okupatuz lortu izan du proiektua atzeratzea. Denboraz etxola handi bat eraiki dute, eta horretan pertsona bat erroldatuta dago gaur egun. Horrek ere geldiarazi du prozesua azken hilabeteetan; ekainaren erdian jaso zuten Tosuko landa astebetean husteko agindua Eusko Jaurlaritzaren aldetik, baina oraindik inor ez da saiatu bertatik botatzen.

Azkenik, ordea, iritsi zaie erroldatuta dagoen pertsonak etxolatik alde egiteko agindua. Arazoa da epaileak horretarako igorri duen dokumentua ez dela oso argia. Desalojorako data ipinita dagoen arren, ez dakite zein den: “Alde egiteko hamar eguneko epea daukagula –tira, zehazki erroldatuta dagoen pertsonak daukala– dio, baina lan egunak edo egun naturalak diren zehaztu gabe”.

Era berean, Ertzaintzari hamar egun eman dizkio epaileak obrak hasteko baldintzak daudela ziurtatzeko, baina ez dago argi epe hori desalojoa gauzatu ostean hasiko den, edo noiz. Momentuz abokatuak ere ez dira gauza izan epailearen agindua zehatz interpretatzeko.

Edozein kasutan, egun gutxi barru jazoko da jazo beharrekoa, agindua joan den astean jaso zuten eta. “Guri, egia esan, ez digu hainbeste axola, modu batean edo bestean hemen ahalik eta gehien irauteko asmoa dugu eta”, diote asanbladako kideek. “Haiek zer jarrerarekin datozen, gure erresistentzia ere halakoa izango da, baina helburua ahalik eta luzeen irautea da. Besteak beste, ahalik eta jende gehien hurbiltzeko”.    

Kanpalditik botatzen badituzte erdigunera joko dute, Algortara. Lehenik eta behin, mobilizazio handi bat egiteko asmoa dute, Udala atzera egitera behartzen saiatzeko. “Getxon jende gutxi dago hemen aparkalekua egitearen alde”, dioskue.

Proiektu faraonikoa da, eta lehen pausoa da Andra Mariko alde hau, udalerrian geratzen den azken gune berdea, urbanizatzeko”, salatzen dute, “bestela ez dauka zentzurik hain biztanle gutxiko inguru honetan metro geltoki bat [2011tik amaituta dago Ibarbengoako geltokia baina ez da sekula erabili] eta aparkaleku erraldoi bat jartzeak”.

Kanpaldian batez beste hamabost lagun izan dira egunero, batzuk Gipuzkoatik eta Arabatik etorrita, baina askoz gehiago antolatutako ekimenetan: “Ez gaude bakarrik, elkartasuna sentitzen dugu”.    

Aste honetako egitaraua hemen ikusgai:

 

Kanal hauetan artxibatua: Tosuko borroka  |  Getxo

Tosuko borroka kanaletik interesatuko zaizu...
2018-06-06 | Topatu.eus
Tosuko landagunean "jarduera ekonomikoen parkea" eraiki nahi dutela salatu dute herritarrek

Tosu Betirako plataformak, Udalaren erabakia kritikatu du. Izan ere, Getxoko Andra Mari auzoko landagunean parkinga ez ezik, “jarduera ekonomikoen parkea” egingo dutela azaldu dute. Erabakiaren aurrean, ordea, herritarrei mobilizatzeko dei egin diete plataformako kideek.


2018-03-12 | Hiruka .eus
Ibarbengoako sabotajea gaitzetsi dute erakundeek, eta Tosu Betirakok legitimatu

Hainbat ezezagunek Getxoko Ibarbengoako metro-parkingaren lanei eraso egin zieten joan den bariku eta zapatu arteko gauean, Ertzaintzaren arabera. Eusko Jaurlaritzak, Euskal Trenbide Sareak eta Imanol Landa Getxoko alkateak gaitzetsi dute ekintza hori. Tosu Betirakok "ez du zerikusirik" horregaz, baina babestu du ekimena. Getxoko Auzokideok elkarteak haizeari leporatu dio gertatutakoa.


2018-02-22 | Hiruka .eus
Tosu landaren aldeko borrokaren "kriminalizazio saiakera" salatu dute

Ibarbengoako parkinga eraikitzeko obrak oztopatzeko "indarkeria" delitua egotzita auzipetutako hiru lagunen kasua artxibatu du epaileak, Tosu Betirako taldeak jakinarazi duenez.


2018-02-20 | Axier Lopez
Aman Komunak
"Ez gara jabetzen herri mugimenduak Euskal Herrian duen indarraz"

Ibiltzen hasi berria da, baina esperientzia eta bizipen asko biltzen du Aman Komunak sareak, herri mugimenduko hainbat taldek eta kidek osatzen dutelako. Joan-etorriko izaera izan nahi du: bakoitzaren kolektibotik sare orokor bat aberastu, sareak tokian tokiko eguneroko lana bizitu dezan. Sorreratik ari dira parte hartzen Maddi Sarasua Errekaleorren bizi den itsasuarra eta Urruñako Hartzea Lopez.


2018-01-30 | Hiruka .eus
Sententziaren zain gelditu dira Ibarbengoako obrak gelditzea saiatzeagatik auzipetutako hiru lagunak

Gaur goizean Getxoko epaitegietan epaitu dituzten hiru ekintzaileek argi dute, "balizko kalteengatik baino, protestak zigortu gura izan dituzte epaiketa honegaz". Izan ere, azaldu dutenez, akusazioak zigor-eskaera bertan behera uzteko proposamena egin du epaiketan, ekintzaileek obra-eremura sartzeko konpromisoa hartuko balute. Halere, horri uko egin eta sententziaren zain gelditu dira hiru gazteak.


2018-01-25 | Hiruka .eus
Hiru lagunek deklaratu beharko dute ostiralean Tosuko obrak gelditzen saiatzeagatik

Urtarrilaren 26an, barikua, hiru lagunek deklaratu beharko dute Getxoko epaitegian, Ibarbengoako parkinga eraikitzeko obrak oztopatzeko "indarkeria" delitua egotzita.


2017-12-19 | Hiruka .eus
Obrek botatako zuhaitz bat utzi dute Algortako Batzokian, "Tosuko txikizioa" salatzeko

Tosu Betirako plataformak deituta, Ibarbengoako aparkalekua eraiki gura duten landarainoko martxa egin zuten zapatuan, hilaren 16an, 200 lagun inguruk. Tosu landa ertzainez inguratuta zegoen; hala ere, lanen hasiera salatu zuten bertan herritarrek. Ondoren, hondeamakinek obren hasieran bota zuten zuhaitz bat hartu eta Algortako Batzokira eraman zuten EAJren jarrera salatzeko, "txikizioak erantzule zuzen bat" daukalakoan.


2017-12-14 | Unai Brea
Larunbatean Tosura egingo den martxara joateko dei egin dute

Larunbatean Getxoko Tosu landara joango den manifestazioan parte hartzeko deia egin du Tosu Betirako asanbladak. Urriaren 21ean ingurua berriz okupatu ostean eraikitako etxolaren alboan egun dute agerraldia, buzo zuriz jantzita eta aurpegiak maskaratxoz estalita; abenduaren 16an egingo den martxara doazenei ere halako bana emango diete, mobilizazioa "ikusgarriagoa izateko eta Andra Mariren suntsipenak ekarriko duen kutsadura salatzeko".     


2017-12-14 | Hiruka .eus
Tosuko landan Jaurlaritzaren eta Viviendas de Vizcayaren arteko akordioa zein den galdetu du EH Bilduk

Getxoko Tosu landaren inguruan galdegin dio Mikel Otero Gabirondo EH Bilduko legebiltzarkideak Eusko Jaurlaritzari. Ekonomia Garapena eta Azpiegituretako Sailburuari egin dio errekerimendua, Jaurlaritzaren eta Viviendas de Vizcaya S.A. enpresaren arteko akordioa zein izan den jakiteko. Izan ere, enpresa horrek Tosu landan duen partzela osora zabaldu dute aparkalekua eraikitzeko obra eremua. Hala, akordioaren baldintzak zeintzuk izan diren ere galdetu[+]


2017-11-28 | Andoni Mikelarena
Pertsona bat kateatu da Getxoko Tosu landan, lanak eragozteko

Hesia eraikitzeko lanetan ari dira hondeamakinak. Herritar bat lurrean etzan eta kateatu egin da. Herritarrei bertara joateko eskatu diete asanbladako kideek. Astelehenean sartu ziren berriz hondeamakinak Tosun.


Azkenak
EGILEA
Eguneraketa berriak daude