Prentsaurreko jendetsua egin du Etxeratek atzoko atxiloketak salatzeko. Operazioak osasun eskubideen aurka egin duela salatu dute. Era berean, Lakuari berriki eskatutako babesa jaso ez izana tamalgarritzat jo dute: “Formak kritikatzera mugatu zen”. Operazio ostean Etxerat elkartea bera Lakuarekin harremanetan jarri zena azpimarratu dute Lehendakaritzako deirik jasotzen ez zutela ikusita.

“Gure konpromisoa gatazkaren konponbidearekin eta bakearekin dago eta bideo horretan jarraituko dugu”, gaineratu du Etxeratek.

Euskal presoen eskubideen alde lanean ari diren lau pertsona atxilotu zituen atzo Guardia Zibilak Araban, Bizkaian, Gipuzkoan eta Nafarroan. Etxerateko kideak diren Nagore Lopez de Luzuriaga Zamudion eta Izaskun Abaigar, Kanpezun  atxilotu zituzten. Fernando Arburua medikua eta preso ohia Donostian atzeman zuten, eta Oihana Barrios psikologoa, Iruñean. Biak Jaiki Hadi elkarteko kideak dira. Abokatuen aurka urtarrilean egindako operazioaren jarraipena da “Pastor operazioa”. Euskal preso politikoen babeserako elkarteen kontrako laugarren polizia operazioa izan da atzokoa.