Jose Mari Dorronsoro Malasetxeberria euskal preso donostiarrak orotara 32 urte eman ditu preso. Zigorra etxean bete du azken hilabeteotan, kontrol neurriekin, baina abuztuaren 27an guztiz aske utzi zuten, Irutxuloko Hitza-ko kazetari Beñat Parrak berri eman zuenez, Frantziako Estatuan preso emandako urteak kontuan hartuak izan direlako.
1990eko hamarkadan espetxeratu zuten lehenengo aldiz Dorronsoro, Frantzian, 38 urte zituela. Zazpi urte inguru pasatu zituen preso Frantzian, eta Espainiara estraditatu zuten 2001ean. Espainiako Auzitegi Nazionalak 26 urteko espetxe zigorra ezarri zion 2002an, ETAk 1987an egin zuen atentatu batekin lotuta. Gerora, hamasei urteko beste zigor bat ere ezarri zioten.
2021ean Iruñeko espetxean sartu zuten, eta 2022an Martuteneko kartzelara ekarri zuten.
