ARGIA.eus

2022ko abuztuaren 17a

Musika Hamabostaldi aberatsa

Argazkia: Quincena Musical- Iñigo Ibáñez
2022ko uztailaren 31

Urtero bezala, Donostiako Musika Hamabostaldiarekin hitzordua derrigorrezkoa da musikazaleontzat. Eta aurreko urteetan bezala, eskaintza askotarikoa, atsegina eta pizgarriz betea dator. 83. hamabostaldia izango da aurtengoa, eta agian ohi baino jaialdi laburragoa izango bada ere, hitzordu oso gomendagarriak eskainiko ditu.

Donostiako Musika Hamabostaldia
NOIZ: Abuztuaren 2tik 27ra

Jaialdiko ziklo batzuen edukia errepasatzen saiatuko naiz, eta nire ustez musika klasikoaren zaleek galdu behar ez dituzten kontzertuei buruzko hainbat gomendio emango ditut.

Beti bezala, kontzertu handienak Kursaal Auditorioan izango dira. Oraingo honetan, ezin dugu jaialdiaren inaugurazioa galdu Monteverdi Choir eta English Baroque Soloists taldeen eskutik, Sir John Eliot Gardinerren zuzendaritzapean. Errezitaldi espiritual eta intimista eskainiko dute, Carissimi, Scarlatti eta Schützen lanekin. Inoiz huts egiten ez duen talde honen kalitate gorena espero dugu.

Baina inaugurazio kontzertuaz gain, Frankfurteko Irratiko Orkestra Sinfonikoa, Txekiar Orkestra Filarmonikoa edo Pablo Sorozabalen 'La tabernera del puerto' edo Donizettiren 'La fille du Régiment' moduko proposamenak ere hitzordu interesgarriak dira abuztu honetako ziklo honetan.

Hala ere, ez ditzagun Kursaal Zikloa bezain interesgarriak edo interesgarriagoak diren beste ziklo batzuk gutxietsi. Adibidez, Victoria Eugenia Antzokian, Víkingur Ólaffson pianista islandiarraren pianoaz gozatzeko aukera izango dugu. Maite dugun beste ziklo batean, Interprete Gazteen Zikloan, talentu berriak entzuteko aukera izango dugu, hala nola Marta Cubas akordeoilaria, Javier Hombría piano jotzailea, edo Nerea Azkona harpa jotzailea, guztiak Musikene Goi Mailako Musika Zentroarekin lotura dutenak.

Musika Aitzaki zikloa aipatu behar dut, jaialdiko musika agertoki ezberdin eta iradokitzaileetan eraman nahi duen zikloa hain zuzen ere, proposamen bikainekin. Abuztuaren 4an Musika Hamabostaldia Getarian izango da, Landarbaso Abesbatzarekin. Horrez gain, Leireko Monasterioan egongo da Jagoba Astiazaranen txistuarekin, Iñar Sastreren pianoarekin eta Eñaut Elorrietaren ahotsarekin, hilaren 13an. Bestalde, Chillida Leku izango da Hamabostaldiko beste agertoki ederretako bat, Gerhard laukotea hartuko duena abuztuaren 19an eta 21ean. Araban ere kontzertu interesgarriak izango dira, hala nola Iñaki Alberdi akordeoi jotzaileak Trebiñun eskainiko duena 15ean, edo Quartetto Adornorena, Zalduondon, 26an.

Ikusten dugunez, badago non aukeratu. Musikaz goza dezagun uda honetan ere.

Kanal honetan artxibatua: Donostiako Musika Hamabostaldia

Donostiako Musika Hamabostaldia kanaletik interesatuko zaizu...
Musika Hamabostaldi freskoa

Garai zailak bizitzen ari gara denerako, baita, eta agian bereziki, kulturarako ere. Distantzia egokiei eustea eta osasun-agintarien gidalerro guztiak betetzea oso zaila da leku itxietan, jende asko dagoenean. Eszenatoki baten gainean orkestra oso batek, edo abesbatza handi... [+]


Kolore eta giroak

Donostiako Musika Hamabostaldiaren azken txanpa honetan orkestra ospetsu eta sendo izango ditugu gure artean, eta, beraz, Euskadiko Orkestra Sinfonikoarentzat erronka bat da talde hauen artean bere indarra erakustea. Apustu serioa egin zuen abuztuaren 24an.


Irakurrienak
ASTEKARIA
2022ko uztailaren 31
Argia buletina
Egunaren laburpena
zure e-postan
Eguneraketa berriak daude