Esperimentatzeko gogoa

Joxi Ubeda Goikoetxea
2017ko apirilaren 16a
Hatsa. Begiz Begi. Baga Biga, 2016

Baionako Begiz Begi taldeak bere ibilbidean beste urrats bat aurrera egin du Hatsa diskoarekin. Beren hirugarren lana da –Joan ihes egin baino lehen (2015, Miraila produkzioak) eta Nora joan? (2013, Miraila produkzioak) dira aurreko biak–, atsegin duten enborretik adar berriak bilatzeko beste saio bat, ohikoak ez diren doinuak eta ukituak probatzeko.

Azkue fundazioak antolatutako Banden Lehia irabazi izanaren ondorioa da Hatsa diskoa. Sari gisa, sei piezako lana grabatu dute Kaki Arkarazok lagunduta, Andoaingo Garate estudioan, modu analogikoan eta ia zuzenean.

Hari batez josi dituzte kantuak, euskal mitologiari lotuta. Beren kezkak azaltzen dituzte paralelismo bat egiten euskal mitologiarekin. Odei Barroso bertsolariak idatzi ditu hitzak, eta Maiana Agorrodoi marrazkilariak egin du azala, euskal etxea irudikatuz egungo jendartearen bihotz gisa.

Kantuetan, post-rock aireak, doinu progresiboak, giroak eta ohiko rock egiturak hausteko ahaleginak suma daitezke. Gitarretan oinarritutako doinuak dira, baina biolinak bere ukitua ematen dio. Pasarte lasaiak, malenkoniatsuak eta pisu handiko une indartsuak daude kantuetan, intentsitate handikoak, eta euskal doinu tradizionalen zantzuak ere antzeman daitezke. Kantuak behin baino gehiagotan entzun behar dira xehetasun guztiez jabetzeko.

Taldeak bilakaera nabarmena izan du 2007an sortu zenetik. Patxi Amulet eta Xabi Etxeberri bikote gisa hasi ziren, folk eta pop kutsuko kantuak egiten. 2010ean Sebastien Luc, Nicolas Armendariz eta Peio Lambert haiekin elkartu ziren, taldea osatu, eta rock progresiboa eta psikodelikoa lantzen hasi ziren. Esperimentatzeko gogoarekin, eta azken urteotan egin dituzten kantuak eta hiru diskoak dira nahi horren ispilu.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Diskoak

Iritzia kanaletik interesatuko zaizu...
ASTEKARIA
Azkenak
EGILEA
Eguneraketa berriak daude