Hor datza Egunkaria


Pello Zubiria Kamino @pellozubiria
2014ko azaroaren 02a

            1
Hor datza Egunkaria
behar zen mezularia
Hor datza Egunkaria
noren aiztoak moztu du
euskaldunon eztarria?
Euskaldunon eztarria
hor datza Egunkaria.


            2
Inmaculada Gomila
Larrunen gaindi habila?
Inmaculada Gomila
mamuak askatu ditu
De Lancrek sorginen bila.
Mamuak sorginen bila
Inmaculada Gomila.


            3
Iñaki zer egin ditek?
Iñaki zer egin ditek?
Gorilek barre dagite
zein zulotan ez miatu
txintxoek ongi dakite.
Iñaki, zer egin ditek?
Txintxoek ongi dakite.


            4
Aita Saindua elizan
errege jauna ehizan
errege jauna ehizan
Luis Goiaren arnasentzat
ez da errukirik izan.
Ez du errukirik izan
errege jaunak ehizan.


            5
Xaho eta Lauaxeta
lumak tristuraz beteta
Xaho eta Lauaxeta
euskaldunen haserrea
bildu zuen kroniketan.
Haserrea kroniketan
Xaho eta Lauaxeta.

            6
Kriskitin eta kraskitin
ez arrosa, ez krabelin
kriskitin eta kraskitin
Eginen altxor galanta
usteltzen dago Hernanin.
Kraskitin eta kriskitin
Egin usteltzen Hernanin.


            7
Etarra naizenez gero
ez dut zerurik espero
ez dut zerurik espero
Del Olmori zor dizkiot
lau gau beltz eta sei ero.
Ezin zerurik espero
etarra naizenez gero.


            8
Eder Madrilen gurbitza
hari begira haritza
eder Madrilen gurbitza
Hartzaren eskutan beti
euskaldunaren bizitza.
Madrilgo hartz ta gurbitza
haiei begira haritza.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Bertsoak

Iritzia kanaletik interesatuko zaizu...
ASTEKARIA
Azkenak
EGILEA
Eguneraketa berriak daude