Gizartea
Ingurumena
Politika
Ekonomia
Kultura
Euskara
Feminismoa
Hezkuntza
Nazioartea
Iritzia
osteguna 2024ko apirilaren 25an
Liburutegia
Begira-begira.
Tradizioaren leihotik
Batzuen artean
Elkar
176 orrialde
21 euro
Tradizioari leiho berriak irekitzen
Zortzi idazle eta marrazkilari baten lanak daude jasoak Elkar argitaletxeak plazaratu duen Begira-begira. Tradizioaren leihotik liburuan. Tradizioa transmisioa dela-eta, transmisio-bideari jarraipena emateko asmoarekin egin dituzte Anjel Lertxundi, Harkaitz Cano, Juan Kruz Igerabide, Jesus Mari Olaizola Txiliku, Joxan Ormazabal, Kirmen Uribe, Mitxel Murua, Miren AgurMeabe idazleek eta Elena Odriozola marrazkilariak liburuan agertzen diren ipuinak, poemak, hizkuntz jolasak eta marrazkiak. Begira-begiran parte hartu duten guztiek ondotxo dakite euskal literaturaren tradizioa altxor kultural eskerga dela, ondotxo dakiten bezala gaurko idazleei dagokiela altxor hori aberastea, transmisio katea eten ez dadin.
Euskal Herriko mendiak. Ehun paisaia
Santiago Yaniz
Sua
128 orrialde
18,50 euro
Gure mendi gailurrak ikusteko ehun era
Pagasarrin mendizale bihurtu zenetik, Santiago Yaniz argazkilari bilbotarrak beti gorde omen du motxilan argazki-kamera batentzako »edo gehiagorentzako» tokia. Beraz, mendizaletasunak eta argazkigintzak emandako esperientziei zor zaio Sua argitaletxearen bidez euskaraz, gaztelaniaz, ingelesez eta frantsesez kaleratu duen Euskal Herriko mendiak. Ehun paisaia liburuan agertzen diren irudi ederrak. Hiru Erregeen Mahaiako tontor elurtuetatik hasi eta lainoa txapeltzat duen Anboto mendiaren argazkira arte, gure mendilerro eta gailurren hamaika ikuspegi. Hor daude Artzamendi, Talatzeko hormak, Larrako karsta, Pagasarri, Andia mendilerroa, Serantes mendia, Gorobel-Sálvada mendilerroko Iturrigorri/Tologorri mendia...
Alternativas a la cárcel en Euskadi
Aiala Olarte Hurtado
Ararteko
386 orrialde
Kartzela saihesteko
Aiala Olarte Hurtadok Arartekoak emandako ikerketa beka bati esker aurrera eraman duen lanaren izenburu zehatza Alternativas a la cárcel en Euskadi: el trabajo en beneficio de la comunidad da. Errudunari kartzelan sartzea ez den beste zigorren bat ezartzeko dauden lege aukerak aztertzen ditu bertan. 60ko hamarkadan hasi zen gizartearen aldeko lanak eginez kartzela zigorra saihesteko erak aztertzen zituen eztabaida, eta 70eko hamarkadan krisian egon bazen ere, berpiztu egin zen 80ko hamarkadatik aurrera. Aiala Olarte Hurtadoren iritziz, espetxe-zigorra ez da kriminalitateari aurre egiteko biderik egokiena, ezta eraginkorrena ere, espetxeak askatasuna ez ezik presoaren beste oinarrizko eskubideak zapaltzen dituelako. Eta eraiki beharko litzateke oinarrizko eskubideak gutxiago mugatuko lituzkeen beste zigor sistemaren bat.
Karmel
Batzuen artean
Euskal Herriko Karmeldarrak
144 orrialde
12 euro, urteko
harpidetza
Luis Baraiazarrak jasotako saria
Luis Baraiazarra Txertudi euskaltzain urgazle eta idazle meñakarrak urte asko daramatza Karmel aldizkarian idazten. Bilboko Liburu Azokak euskararen nahiz euskal letren alde gogor ahalegintzeagatik Urrezko Luma saria eman zionean, poz handia izan zuten Karmelekoek, eta Luis Baraiazarraren bizitza eta lanari eskaini dizkiote 255. zenbakiko hainbat orrialde. Beste hainbat egin dute Elisabet Hirutasunarena doatsuarekin, oraintxe betetzen baita bere heriotzaren lehen mendeurrena. Bere biografiaren aztarnak jasotzen dituen lanean, 1880ko uztailean jaiotako emakume honen txikitako, nerabezaroko eta moja bilakatu zeneko argazkiak ere eskaintzen dira. Jarraian, Luis Baraiazarrak euskarara itzulitako Elisabeten idazlan bi azaltzen dira: Azken gogo-jardunak eta Utz ezazu maitatzen.
Rimmel
Koldo Izagirre
Susa
122 orrialde
11,50 euro
Koldo Izagirrek bere kuttunenei idatzitakoak
Poema liburua da Rimmel. Pertsona baten bizitzan unerik gogoangarrienak izan daitezkeen haietan nolako sentimenduak izan dituen agertzen ahalegintzen da poeta. Ondorengo bat izan behar duela-eta, ospitalera joatean aitak duen barrua. Semea izango zutela uste, eta azkenean alaba jaio zaiela jakitean izandako ezusteko gozoa. Eta handik aurrera gertatutako gainerako ustekabeak. Alabari kontatzen dizkio poetak, baina noizean behin jaio berria den haurraren barruan sartu eta hark senti ditzakeenak irudikatzeari ekiten dio baita ere. Lau ataletan banatu ditu Koldo Izagirrek poemok: Hezur ondoko mami, Nola jaso ote zuen harria trikuak?, Ur gazia zara eta Laster gure alaba zu bezalakoa izanen da.
Paraquaria
Arantza Amezaga
Ttarttalo
462 orrialde / 25 euro
Matalazen garaiko Zuberoa hura, Amezagaren nobelan
Arantza Amezaga Iribarren idazle emankorra Buenos Airesen jaio zen, 1943an. 1936ko Gerraren ondorioz atzerrira joan behar izan zuen familia euskaldun baten alaba da. Paraquaria, Ttarttalo argitaletxearen bidez kaleratu duen bere azken nobela, XVII. eta XVIII. mendeetan girotuta dago. Orduko Zuberoan bizi behar izan zituzten borrokak azaltzeaz gain, haiek galdu eta gero Matalaz apaizarekin aritutako gerrilari baten Ameriketarako ihesa, eta hari zein bere ondorengoei gertatzen zaizkienak kontatzen ditu.
Irakurrienak
Matomo erabiliz
#1
Jenofa Berhokoirigoin
#2
Karmelo Landa
#3
Juan Aldaz Arregi
#4
#5
Miel Anjel Elustondo
Azkenak
2024-04-28
Jenofa Berhokoirigoin
BOLLOTOPAKETAK
Bollera subjektua erdigunean jartzera datorren hitzordua
Apirilaren 26, 27 eta 28 hauetan iraganen da Euskal Herriko bolleren topaketa, Leitza herrian. Izenak argiki dioen gisara bollerei irekitako jardunaldiak dira, baina, oro har, sexu/genero disidente oro da gomitaturik. Egitarau aberatsa eta askotarikoa ondurik, taldean... [+]
2024-04-28
Olaia L. Garaialde
Gorputz hotsak
"Pianoa da konpainia izatea bezala, ez zara inoiz bakarrik sentitzen"
Musika klasikoa, regetoia eta rocka gustuko ditu Jakes Txapartegi pianistak (Hondarribia, Gipuzkoa, 2009). Itsua da, musika klasikoa jotzen du eta poliki-poliki jazza eta inprobisazioa ikastea gustatuko litzaioke. Etxean zuen teklatuarekin Pirritx eta Porrotxen “Maite... [+]
2024-04-28
Axier Lopez
Dronea, munduko botere harreman desorekatuen ikur eta eragile
Giza asmakizun oro lez, onena eta txarrena egiteko gai dira. Baina, tamalez, dronea, beste ezeren gainetik, Mendebaldeko potentzia kapitalistek munduaren gehiengoa menpean jartzen jarraitzeko tresna nagusietakoa da. Zirrikitu teknologikoetatik haratago, funtsezko pieza da bizi... [+]
2024-04-28
Miel Anjel Elustondo
Iñaki Soto. Erredakzioko kazetaritza ardatz
"Gure Herriaren etorkizuna eta hizkuntzarena batera joango dira"
25 urte beteko ditu aurten Gara egunkariak. Ez da erraz izan. Teknologiak ekarritako iraultzari neurria hartuagatik ere, Espainiako auzitegietako epaileek erabakitako oztopo arbitrarioek egunean eguneko jarduna baldintzatu dute. Mirari hutsa, Iñaki Soto zuzendariaren... [+]
2024-04-28
Urko Apaolaza Avila
Migrazio eta Asilo ituna: Europaren legatu kolonialista denon begien bistan
Europar Batasunean berriki onartu den Migrazio Itunak, asko zaildu dizkie gauzak euren herrialdetik ihesi doazen eta asiloa eskatzen duten pertsonei. Eskuin muturraren tesiak ogi tartean irentsita, migratzaileentzako kontrol neurri zorrotzagoak onartu dituzte Estrasburgon,... [+]
Eguneraketa berriak daude