ARGIA.eus

2021eko maiatzaren 06a

Zerbitzu publikoen alde EAEn deituriko grebak "erantzun zabala" izan du sindikatuen esanetan

  • Hiriburuetako manifestazioetan 18.000 lagunek parte hartu dutela diote grebaren deitzaileek. Jarraipena "oso orokortua" izan da, baina salatu dute Eusko Jaurlaritzak ezarritako gutxieneko zerbitzuen ondorioz langile askori greba eskubidea ukatu zaiola.

Urko Apaolaza Avila @urkoapaolaza
2021eko apirilaren 22a
Bilboko manifestazioa izan da jendetsuena, 18.000 lagunek hartu dute parte mobilizazio guztietan (arg.: ELA)

ELA, LAB, CCOO, SATSE, ESK eta Steilas sindikatuek deituta, Araba, Bizkaia eta Gipuzkoan greba egin dute ostegun honetan sektore publikoko milaka langilek. Sektorean enplegua sortu eta "kontsolidatzea" eskatzeko deitu dute greba, izan ere behin behinekotasun tasa ia %40ra iristen da kasu askotan.

Deitzaileen esanetan, grebak "jarraipen zabala" izan du, batez ere behin behineko langileen artean, "ia erabatekoa". Hezkuntza ez unibertsitarioan jarraipena "desberdina" izan dela azaldu dute sindikatuek, baina erantzuna ere nabarmentzeko modukoa izan dela, esaterako Lehen Hezkuntzan, non langileen %55ak egin duen bat, baita eskoletako sukaldarien artean edo hainbat udaletan ere, hiru hiriburuetakoetan kasu.

Eusko Jaurlaritzak, berriz, grebak %16,4ko jarraipena baino ez duela izan adierazi du, eta Olatz Garamendi Gobernantza Publiko eta Autogobernuko sailburuaren arabera, "jarrera proaktiboa" izaten ari dira lan eskaintza publikoak onartu eta deitzeko.

Sindikatuek deitoratu dituzte Jaurlaritzak ezarritako gutxieneko zerbitzuak, baina oztopo horien gainetik langileak kalera atera direla azaldu dute: "Garbiketako langile guztiak greba eskubiderik gabe utzi dituen arren %100eko zerbitzu minimoak ezarriz, oro har arratsaldez lan egiten duten garbitzaile ugarik hartu dute parte goizeko manifestazioetan".

Deitzaileen zenbaketaren arabera, Gasteizen, Donostian eta Bilbon egin manifestazioetan 18.000 lagunek hartu dute parte. Bilbokoa izan da jendetsuena eta milaka pertsonek hartu dituzte kaleak.

Manifestazio amaieran adierazpen bateratua (pdf) irakurri dute eta azpimarratu egun 120.000 lagun dituztela azpikontratazio egoera prekarioan erakunde publikoek: "EAEko sektore publiko osoan sistematikoki, modu orokortu batean eta kasu askotan iruzurrean errepikatzen den behin behinekotasun maila onartezin hori azpikontratazio eta pribatizazio helbururako ezinbesteko aurretiazko pauso bezala azaldu daiteke soilik", esan dute.

Hala, euren ustetan beharrezkoa da "egiturazko lanpostuak azaleratzea", behin behinekotasun maila horiekin amaitzeko: "Bizitzen ari garen pandemia honetan zerbitzu publikoak aurrera ateratzen ari zareten milaka langile ezin direlako kalean geratu".

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Langile borroka kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude