42 urte zituen eta hamabost bat urte zeramatzan bizitzen Arroyo de la Luzen. 9 eta 12 urteko haurrak utzi ditu. Emakumeak labana zauriak zituen, senarrak ere bai. Ospitalean atxilotuta dago. Erakundeek genero indarkeria gertaeretan abiatzen den protokoloa jarri dute martxan. Salaketarik ez zuen jarri emakumeak.

Gaitzespenak eta mobilizazioak

Arroyo de la Luzen bi dolu egun izendatu dituzte. Ostiralez, elkarretaratzea egingo dute udaletxe aurrean, eta larunbatez salaketa ekintza egingo dute.

Villabona-Amasako Udalak ere bi dolu egun egingo ditu eta protestekin bat egingo duela adierazi du. Adierazpena ere onartu dute.

Euskal Herriko Emakumeen Mundu Martxak ostiraleko mobilizazioetan parte hartzeko deia egin du, izan ere, manifestazioa egingo da Tolosaldeko herrian 18:30ean. Mundu Martxak gogor salatu du erailketa sexista eta autodefentsa feministara deitu du “gure bizitzak daudelako jokoan”.

Gipuzkoako Foru Aldundiak eta Villabona-Amasako EH Bilduk ere hilketa salatu dute.