Astelehen honetan Gasteizen eskaini du prentsaurrekoa Euskal Herriko Mugimendu Feministak, azaroaren 25ean Indarkeria Matxistaren Aurkako Eguna dela-eta, aurtengo aldarriak aurkeztu eta mobilizazioetara deitzeko. Hala, indarkeriaren aurrean erasotzailearekin konplizitatea salatuko du, Zuen hipokrisia indarkeria da! lelopean. 

Indarkeria matxista sostengatzen duten egiturak, eta konplizitate sare eta anaidiak salatuko dituzte. Adierazi dute “Euskal Herriko hainbat txokotan erasoak publikoki salatzera atera garenean, boikotatuak eta gutxietsiak” izan direla, eta feminismoaren aurkako diskurtsoak “inpunitate osoz” zabaltzen direla.

Azaldu dutenez, matxismoa hainbat zapalkuntzekin gurutzatuta aurkezten da askotan. “Emakume*, trans eta bollerok jasaten dugun indarkeria ez da ausazkoa; sistema kapitalista, zisheteropatriarkal eta arrazistak” hori betikotzeko dituen egitura eta mekanismoen ondorioa dela nabarmendu dute. Zentzu horretan, ohartarazi dute feministen aurkako mezuak, mezu arrazistak eta mezu transfoboak ari direla zabaltzen hedabideetan, sareetan eta kaleetan. 

Hori guztia salatzeko, hiriburuetako manifestazio deialdiak aurkeztu dituzte. 19:00etan izango dira, Baionan izan 18:30ean abiatuko da geltokitik, eta gainerakoetan 19:00an da hitzordua: Bilbon Jesusen Bihotzetik abiatuko da, Donostian Bulebarretik, Gasteizen San Anton Plazatik eta Iruñean Gaztelu Plazatik. 

Itaiak ere mobilizatzera deitu du

Bestalde, Itaiak ere mobilizatzera deitu du indarkeria matxistaren aurkako egunean. “Matxismoaren normalizazioari eta faxismoaren gorakadari” erantzuteko kaleak hartuko dituzte. Euskal Herriko 22 txoko ezberdinetan egingo dituzte mobilizazioak.

Salatu dute indarkeria matxista kasuak etengabe azaleratzen direla, baina azaleratzen ez diren erasoak askoz gehiago direla. Izan ere, beren esanetan “inpunitate osoz” egiten dira asko, eta "erasoak egunerokotasun bihurtu diren testuinguru honetan, ez dago gaitzespen sozialik".

Hori hauspotzen duen "gorakada faxista" ere irmoki salatu dute: "Ideologia faxistak eta ultraeskuindarrak matxismoa normalizatzen ari dira, instituzioetan emakumeen eskubideetan atzera egitea planteatzen dute, sare sozialetan emakumeen irudi azpiratua zabaltzen dute, eta indarkeria matxista ukatzen ez dutenean, diskurtso arrazistak zabaltzeko erabiltzen dute".