Legeak sexu abusu eta sexu erasoaren artean bereizketa egin du orain arte. Baimenik gabe egiten direlarik, hemendik aurrera denak sexu eraso izango dira; desagertu egingo da abusua.

“Bakarrik bai da bai” leloa lege bihurtuko da: “Baimena dagoela ulertuko da libreki eta modu argian pertsonaren borondatea adierazi bada”.

Taldeko erasoek larriagotu egingo dute delitua.

Sexu delituak auzitegi espezializatuetan epaituko dira, horretarako formazioa jaso duten epaile eta fiskalekin.

Justiziara jotzea ez da baldintza izango sexu erasoa jasan duen pertsona biktimatzat hartzeko, eta beraz dagozkion eskubide eta laguntzak jasotzeko.

Kaleko jazarpena ere aintzat hartuko du legeak. Delitu arintzat hartua izango da eta zigortuko du “beste pertsona bati adierazpen, jarrera edo proposamen sexual edo sexistak egitea, biktimarengan egoera objketiboki umiliagarria edo intimidagarria sortzen dutenean, bestelako delitu larriagoetara iritsi gabe”. Isunak, lokalizagailuak edota komunitaterako lanak izango dira zigorrak.

Biktimek arreta integrala jasotzeko zerbitzu sarea jarri nahi du martxan legeak. Adin txikiko biktimek zerbitzu espezializatu eta egokituak izango dituzte, beste herrialde batzuetan dagoeneko badiren “umeentzako etxeak” eredua ezarriz.

Prebentzioan eta sentsibilizazioan indarra jartzen du proiektuak. Heziketa sexualean, berdintasunean eta aniztasun afektibo-sexualean edukiak integratu beharko dira hezkuntzan, baita erasoak prebenitu eta antzemateko protokoloak ere.

Berritasun bat ere jaso dute proiektuaren azken bertsioan: proxenetismoari eta esplotazio sexualari lotuta, prostituzioarekin aberasten diren klubetako jabeengan jarriko da fokua.