Realak zazpi milioi euro zor dizkie Anoeta berritzen ari diren langileei, ELAren arabera

  • ELA sindikatuak irregulartasunengatik salatutako enpresak 22 dira eta Lan Ikuskaritzak lege urraketa gehiago berretsi ditu. Estadioa langileen bizkar ari direla birmoldatzen dio ELAk eta horretan Donostiako Udalak eta klubak "ardura zuzena" dutela.

Urko Apaolaza Avila @urkoapaolaza
2019ko azaroaren 15a
Obra publikoetako prekarietatea salatzeko Anoeta giza-kate batekin inguratu zuen ELAk 2018an.

Gipuzkoako Batzar Nagusietara datuak eskuan azaldu da Igor San Jose ELAko eraikuntza arduraduna, ostegunean egindako batzarrean. Bere esanetan, 2018an egindako kalkuluen arabera 4,5 milioi euro zor dizkiete azpikontratek langileei, baina abendurako Realak bere proiektuarekin sorturiko zorra zazpi milioi eurokoa izan litekeela uste dute.

Soldata irrigarriak, kobratu gabeko aparteko orduak edo Gizarte Segurantzari iruzurra. Lan baldintza prekarioen bidez lortu dute Anoeta berritzeko proiektua merketzea, ELAren ustez. 70 milioi euro balio behar lukeena 50 milioi euroko aurrekontuarekin ari dira egiten, LARRUN honetan kontatu genuen bezala.

Sindikatuak makina bat bider salatu ditu egoera eta iruzur horiek eta Eusko Jaurlaritzako Lan sailak berak baieztatu izan ditu, salaketak fiskaltzaren esku utziz. Hiru enpresa obretatik kanpo geratu ziren horren ondorioz eta oraingoz 250.000 euroko isunak jarri dizkiete lanean segitzen duten azpikontratei, dozenaka langile dokumentazioa faltsututa ari zirelako.

San Josek Batzar Nagusietan jakinarazi duenez (ikus agerraldiaren bideoa), Lan Ikuskaritza irregulartasun gehiago ikertzen eta berresten ari da, baina egoera horren aurrean “Realak eta Donostiako Udalak beste alde batera begiratzen jarraitzen dute”, azaldu du sindikalistak.

"Zer egingo dut? Hipoteka eta familia dauzkat"

Batzar Nagusietako bilkuran ez ohiko gonbidatu baten testigantza entzun behar izan dute politikariek oraingoan. ELAko ordezkariarekin batera joan baita John Fredy Gutierrez, Anoetako obretako langilea.

John Fredy Gutierrezek Anoetako estadioko obrekin bizitako egoera latzak kontatu zizkien batzarkideei, argi eta garbi.

"Vilariñok kontratatu ninduen. Bilbon bizi naiz eta migratzaile guztiak bezala toki askotan mugitzen naizenez, egun batean deitu zidaten beharrean ari nintzen jakiteko. Hala zen, baina autonomo batentzako autonomo bezala, orain jakin dut horri 'autonomo faltsua' izatea deitzen zaiola. (...)

San Mamesen lan egitea eskaini zidaten, eskaintza ona iruditu zitzaidan: Bilbon lana, kotizatu egingo nuen... Baina eguna iritsita enkargatuak esan zidan Anoetara gindoazela. Ez duzu inoiz letra txikia irakurtzen, egiaz, kontratua Anoetara iritsi eta bi egunera egin zidaten (...).

"Ordua 6,5 euro kobratzen nuen  eta enkargatu jarrita euro bat gehiago kobratuko nuela esan zidaten. Horretarako furgonetan eraman behar nituen lankideak. Zer egin? Familia daukat, hipoteka ere bai"

Lanean hasi nintzen pentsatuz Bilboko hitzarmenarekin ariko nintzela, baina lehen nomima iritsitakoan konturatu nintzen ez zela agindu zidatena, eta gainera ez nengoen Bilbon... 'Zu lasai, laster eramango zaitugu' esaten zidaten. 6,5 euro kobratzen nuen ordua eta enkargatu jarrita euro bat gehiago kobratuko nuela esan zidaten. Horretarako furgonetan eraman eta hartu behar nituen lankideak. Zer egin? Familia daukat, hipoteka ere bai...(...)

Azkenean sindikatuan salatu genuen gaia. Behin 20:15ean lanetik atera ginenean inspektorea aurkitu genuen. Lehen galdera: 'Zenbat ordu sartzen duzu?'. Esan nion ea nola nahi zuen galdera horri erantzutea, ikusteko egun horretan zer ordutan sartu nintzen eta noiz atera (...)

"Jende guztiak bezala emigratu egin nuen eta hori da emigratzeak duena, baina ni bat gehiago naiz orain"

Langileen zesio ilegala egin zuten gurekin. Igorri eskerrak eman nahi dizkiot, zuen aurrean, lehen aldiz lan bat dudalako baldintza duinetan. Nire herrialdera joan ahal izan dut –bost urte eraman ditut joan gabe– eta ordaindutako oporrak izan ditut.(...)

Horraino hitz egingo dut, zeren eta kontatzen hasten banaiz hemen bizi izan dudan guztia... Hala ere beste bat bezala sentitzen naiz. Espainian hemeretzi urte egingo ditut jadanik, bost urtera dokumentazioa lortu nuen; jende guztiak bezala emigratu egin nuen eta hori da emigratzeak duena, baina ni bat gehiago naiz orain. Orain zuen txanda da hori baloratzea".

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Prekarietatea kanaletik interesatuko zaizu...
Azkenak
EGILEA
Eguneraketa berriak daude