Japoniako Gobernuak eta COI Nazioarteko Batzorde Olinpikoak pasa den hilean erabaki zuten 2020ko Olinpiar Jokoak 2021era atzeratzea, baina data horretan egitea ere zail ikusten du Kobe-ko Unibertsitateko irakasleak, The Japan Times egunkariak jaso duenez. Iwata “ezkor” agertu da, ezinbestean bete beharreko bi baldintza daudelako: "Batetik, COVID-19 Japonian kontrolatzea; eta bestetik, COVID-19 leku guztietan kontrolatzea, mundu osoko kirolari eta ikusleak gonbidatu behar direlako".

Adituak dio balitekeela datorren udarako Japoniak gaitza kontrolaturik izatea, baina ez duela uste mundu osoan gauza bera gertatuko denik: "Zentzu horretan oso ezkorra naiz, ez dut uste Olinpiar Jokoak 2021ean egiterik izango denik. Aukeraren bat izango litzateke, agian, neurri batzuk hartuz gero, ikusle edota parte-hartzaile kopurua mugatzea esaterako".