Amazoneko biltegiak Europako Parlamentuan ordezkatuta dauden estatu kide guztietan daudenez, “kezka handia” helarazi diote hainbat eurodiputatuk Amazon Europako zuzendari Xavier Garamboisi, produkzioa eten ez izanak biltegietan lan egiten duten langileak arriskuan jar ditzakeelako.

Hainbat adibide azaltzen dute eskutitzean. Italiako Bergamon, birusaren hedapenaren epizentroan, langileak behartuta daude biltegira joatera eskariak bermatzeko, nahiz eta sindikatuek antolaketaz eta lan erritmoaz negoziatzeko eskaera egin. Frantzian, langile bat zainketa intentsiboetako unitatean dago, eta gutxienez bost Covid-19 kasu identifikatu dituzte. Frantziako lan ikuskaritzak Amazon ohartarazi zuen, langileak babesteko neurri guztiak har ditzan. Polonian, langileen osasuna bermatzeko hartutako neurrien seriotasun faltaren ondorioz, langileak lana uzten ari dira.

Leku guztietan, langileak Amazonen zuzendaritzari presioa egiteko antolatzen ari direla diote, haien eta inguruan dituztenen osasuna zaintzeko. Baina aldiz, konfinamendu aldi honetan, Amazonetik aginduak iristen jarraitzen dute, osasuna arriskuan jarriz. Ez da osasun neurririk aplikatzen: ez da ez eskularrurik ez maskararik ematen. Nola ulertu, gainera, Polonian langileei esan zaiela eskuak gehiegitan garbitzen dituztela eta lan-erritmoa kaltetzen dutela?

Biltegitik ateratzen diren merkantzia gehienak aisialdiarekin lotutakoak direla azpimarratzen dute eskutitzean. Bideojokoen eskaria %100 handitu da konfinamendua hasi zenetik, eta era guztietako aisialdirako objektuak ugaritu: panpinak, komikiak, DVDak, jostailuak... Sindikatuen zifren arabera, ateratzen diren produktuen %10 baino ez dira funtsezko ondasunak (elikagaiak, higiene produktuak...), eta, beraz, janari-denda edo supermerkatu gehienetan daude eskuragarri.

Dioten moduan, Europa osoko medikuek Amazonen webguneen jarduera gelditzea gomendatzen dute. Baina Europar Batasuneko zenbait estatutan, langileei egindako presioen berri jakin da, eta mehatxu egin zaie soldata kentzeko, lanera etortzeari uko eginez gero. Ondorengo galderak luzatu dituzte: Prest al daude milaka langileren bizitza sakrifikatzeko, haien irabaziak ziurtatzeko aitzakiarekin? Negozioa kosta ahala kosta mantentzeak biltegietan lan egiten duten pertsonen osasunak baino gehiago balio al du?

Leïla Chaibi, Eugenia Rodríguez Palop, Özem Demirel, Salima Yenbou, Konstantinos Arvanitis, Nikolaj Villumsen eta Kateřina Konečná eurodiputatuak dira sinatzaileak.