Aurreko legealdian ere izan zen gai horri buruz aurrerapausorik. Kalamu-kontsumitzaile klubetako dozena bat arduradunek eta adituk parte hartu zuten hainbat batzarretan, legalki zehaztu gabe dauden kolektibo horiei konponbide bat bilatzeko.

Izan ere, elkarte horiek egoera bitxian daude: norbere kontsumorako landatzeko eskubidearen eta merkaturatzeko debekuaren artean.

Batzarretako batean, bestalde, Farmakologia katedradun bat izan zen: kalamuaren osasun kalteak hura debekatzeko txikiegiak zirela esan zuen eta, ondorioz, legeztatu beharko litzatekeela. Espainiako Drogen Plan Nazionaleko ordezkari Francisco de Asís Babínek ere parte hartu zuen, eta EAEk araudi propioa ezin duela eduki adierazi zuen.

Hauteskunde autonomikoen aurrerapenak, hala ere, batzar horietako lanak bere horretan utzi zituen, atzo arte. Arartekoak adierazi du auzi hori argitzeko premia.

Alderdi guztiek bat egin dute adin gabekoak kalamuaren kontsumoarengandik babesteko beharrean, eta kontsumo elkarteak esparru juridiko baten barruan sartzeko premian.

Gaiaren inguruan txosten arautu bat osatzeko batzarra lehenbailehen egiteko erabakia hartu dute, ahal izanez gero, udara hasi baino lehen.