Inbestidura prozesua ezusteko gabe igarota, Chivitek Nafarroako lehendakari kargua hartu du
11:30ean izan da kargua hartzeko ekitaldia Nafarroako Parlamentuan, eta gonbidatu gisa joan dira hainbat ordezkari politiko, tartean Iñigo Urkullu EAEko lehendakaria. Kontseilari berriak ere izendatu dituzte: lau Geroa Baik gidatuko ditu eta bat Zurekin Nafarroak; gainontzeko zortzirak PSNren esku geldituko dira.
Ostegunean goizean hartu du Nafarroako Gobernuko Lehendakari kargua bigarren aldiz María Chivitek, eta ekitaldia egin dute hainbat gonbidaturen aurrean. Esaterako, Iñigo Urkullu Eusko Jaurlaritzako lehendakaria bertan izan da, eta baita Espainiako Gobernuko presidenteorde lehena Nadia Calviño ere.
Chivitek 40 minutu inguruko diskurtso laburra egin du eta euskaraz esaldiren bat aipatzen saiatu da.
Lehen inbestidura saioan egin ez bezala, oraingoan ez du arazorik izan lehendakari hautatua izateko. Izan ere, PSNk, Geroa Baik eta Zurekin Nafarroak alde bozkatu dute, eta EH Bildu abstenitu egin da. Behin saioa amaituta, eskerrak eman dizkie orain arte gobernua osatu duten kontseilariei, eta atea ireki berriei.
Guztira, zortzi kontseilari izango ditu PSNk: Felix Taberna, Óscar Chivite, Carlos Gimeno, Amparo López, Carmen Maeztu, José Luis Arasti, Rebeca Esnaola eta Juan Cruz. Geroa Baik, berriz, lau: Ana Ollo, Mikel Irujo, Fernanfo Domínguez eta José Mari Aierdi. Azkenik, Zurekin Nafarroak bakarra izango du: Begoña Alfaro.
Horien artean, Felix Taberna presidenteorde lehena izango da Nafarroako Gobernuan. Deigarria da, gainera, José Luis Arastiren izendapena Ekonomia kontseilari gisa: Arasti orain arte Espainiako Gobernuko ordezkari izan da Nafarroan.
Foru Hobekuntzaren erreforma adostu dute Nafarroako eta Espainiako gobernuek, Trafikoa foru exekutiboaren eskuduntza historiko eta esklusiboa dela blindatzeko.
Eskuin muturreko taldeek eta funtzionario publikoek eragindako motibazio politikoko ekintzen biktimen lehen hamabi aitorpenak egin ditu Nafarroako Gobernuak. Beste hirurogei espediente aztertzen ari da.
Asteazkeneko gobernu bileran hartu zen erabakia eta horren ondorioz, Espainiako Gobernuko Trantsizio Ekologikorako Ministerioak Forestalia konpainiari emandako baimenen aurkako helegitea jarriko du foru gobernuak.
Nafarroako Gobernuak Espainiako Gerra Zibilaren eta frankismoaren artxibo digitalaren plataforma, Oroibidea, gaurkotu du eta bildutako errepresaliatuen testigantzak laukoiztu dituzte.