Foru Hobekuntzaren erreforma adostu dute Nafarroako eta Espainiako gobernuek, Trafikoa foru exekutiboaren eskuduntza historiko eta esklusiboa dela blindatzeko.
Otsailean, trafiko eskuduntzaren transferentziaren errege-dekretua baliogabetu egin zuen Espainiako Auzitegi Gorenak. Ebazpen hori gainditzeko Foru Hobekuntzaren erreforma adostua aurkeztu zuten atzo arratsaldean, Nafarroako eta Espainiako gobernuek.
“Erreforma honek Nafarroa osoki berrintegratu egiten du Trafiko eskuduntzen kudeaketan”, azaldu zuen Angel Victor Torres Lurralde Politika ministroak, atzo arratsaldean Nafarroako Jauregian egindako ekitaldian.
Blindaje horrek bi gako ditu: batetik, adosturiko erreformak trafikoarena eskuduntza historikoa dela zehazten du; bestetik, eskuduntza hori esklusiboa dela gaineratzen du, Guardia Zibilarekin partekaturikoa izateari atea ixteko. Hala, Gorenak errege-dekretuaren aurka erabilitako bi argudioak indargabetzen ditu.
“Honako hau beste urrats bat da beti erakutsi dugun konpromiso politiko eta instituzionalean, beste bultzada bat da Konstituzioarentzat eta Foru Hobekuntzarentzat”, nabarmendu zuen Maria Txibite foru lehendakariak.
Foru Hobekuntzaren erreformak hainbat urrats egin beharko ditu orain. Lehenik eta behin, Nafarroako Gobernuak onartuko du, gaurko lan saioan. Jarraian, Nafarroako Kontseiluak txostena eginen du. Foru Parlamentuan eztabaidatu eta bozkatuko dute. Azkenik, Espainiako Kongresuak eta Senatuak ere onartu beharko du. Txibitek urte amaierarako prozesua burutua izatea espero du.
Contigo-Zurekin taldeak proposatutako ebazpena onartu du Nafarroako Parlamentuak, EH Bildu eta Geroa Bairen aldeko bozkekin. Israelek Gazan duen jarrera genozida salatu eta neurriak hartzeko eskatu dio Parlamentuak Nazioarteko Olinpiar Batzordeari.
Eskuin muturreko taldeek eta funtzionario publikoek eragindako motibazio politikoko ekintzen biktimen lehen hamabi aitorpenak egin ditu Nafarroako Gobernuak. Beste hirurogei espediente aztertzen ari da.
Asteazkeneko gobernu bileran hartu zen erabakia eta horren ondorioz, Espainiako Gobernuko Trantsizio Ekologikorako Ministerioak Forestalia konpainiari emandako baimenen aurkako helegitea jarriko du foru gobernuak.
Iruñeko Erorien Monumentuarekin zer egingo da? Hori da legealdi honetako gai izarretakoa Hiri Buruzagian azken asteetan. Asteazken honetan, Joseba Asiron alkateak kazetarien aurrean jakinarazi duenez, legealdi honetan emango zaio irtenbidea gaiari eta herritarrek... [+]