Espainiako Estatuko estoldetako paisaia ezaguna erakusten du liburuko informazioak, hemen GAL, han PSOE eta Felipe González edo, haratago, Espainiako errege ohi Borboiko Juan Carlos. Javier Chicotek Diario de Noticias-en egindako elkarrizketan azaltzen duenez, Manglanoren familiak jo zuen haiengana, aitaren biografia bat egiteko eskatuz eta horretarako haren artxiboa utziz.

Liburuan aipatzen da –ABC-n ere argitaratu zen lehenago– nola Antoni Asunción sasoiko Barne ministroak kontatu zion Manglanori Espainiako Barne Ministerioak bonba-gutunak bidali zizkiela HBko kideei. PSOEko Felipe Gonzálezen gobernu garaian izan zen eta José Luis Corcuera barne ministro zela, 1988 eta 1993a artean. Gutun-bonba haietako batek hil zuen 22 urteko José Antonio Cardosa postaria 1989an Errenterian. Barne Ministerioak ETAri egotzi zion atentatua eta kasua oraindik argitzeke dauden hilketen artean dago.

Chicote kazetariak harrigarritzat jotzen du Cardosaren auzia artxibatua egotea, Corcueraren ondorengo Barne ministroak CESIDeko egoitzara jo eta hango buruari bonba-gutunena nola izan zen kontatzen dionean: “Eta hori grabatu egin zen, transkribatu eta Manglanok artxibatu egin zuen”. Horrez gain, bere ustez, harrigarria da halako informazioek ez izatea oihartzun handiagorik Espainiako hedabideetan.

Liburuan esaten denez, Manglanok 1994an jakinarazi zion José María Aznar PPko buruari “GAL estatu auzia zela”. Aznar 1996an iritsi zen Moncloara, eta Manglanok aitortzen du berak nahiago zuela –eta Espainiako erregeak ere bai– Felipe Gonzálezek jarraitzea. Gero 1997an, González bildu zen Manglanorekin, GALeko epaiketen aurrean bide-orria finkatzeko, eta jakinarazi zion GALen erantzukizun politikoa hartzeko prest zegoela, baina ez erantzukizun penalik.

Margarita Robles

Estatuaren estoldetatik bideratutako beste hainbat kontu ere aipatzen dira elkarrizketan, besteak beste diru ordainketak, bai Rafael Vera Estatu Segurtasuneko idazkari ohiari egin zitzaizkionak edo Espainiako erregearen amorante izan ei zen Barbara Rey aktoreari bideratutakoak. Ordainketa hauetan, gainera, egun Defentsa Ministro den Margarita Robles ere aipatzen da. Esaten da Robles Estatuko Segurtasunerako idazkaria zenean, bere bidez 600 milioi pezetako ordainketak (3,6 milioi euro inguru) egin zitzaizkiola Errege Etxeari, honek Barbara Rey-ren isiltasuna ordain zezan. Manglanoren esanetan, Gonzálezek GAL kontuen garbiketa egiteko ekarri zuen Margarita Robles gobernura.

Manglanok aipatzen duenez, CESID behatzaile gisa zegoen GALeko aferetan. Espioien buruak artxiboko ohar batean dioenez, une batean Felipe Gonzálezekin hitz egin zuen ETAko buruzagitzak Iparraldean izan behar zuen bilera bati buruz. Oharrean aipatzen da zuzendaritza atxilotzeko aginduaz, baina ez da aipatzen nola egingo den. Juan José Millás El País-eko kazetariak ere gaiaz hitz egin zuen 2010ean argitaratutako erreportajean eta hartan, Gonzálezek aitortzen du bere esku egon zela bilera hori lehergailuz lehertu ala ez erabakitzea; eta ezetz erabaki zuela. Chicotek dio ez dagoela garbi Gonzálezek eta Manglanok aipatzen duten bilera bera den.