Azken orduotan, aurtengo Gazte Sozialisten Topaguneari argi egiten jardun dute Gazte Koordinadora Sozialistak eta Ikasle Abertzaleakek. 2020. urteko edizioa Legution (Araba) izango dela jakinarazteaz gain, bonoen inguruko informazioa plazaratu dute, eta orain, iragarpen berri batekin datoz gurera: Topagunearen aurkezpen nazionala antolatu dute otsailaren 9rako, igandea, Legazpin (Gipuzkoa).

Hala, arratsalde osoko egitaraua prestatu dute egun horretarako. 16:30ean hasiko da aurkezpena, Urbeltzeko aterpeetan, Topagunea: antolakuntza eredu berria eta aurtengo ekimenaren hurbilpen bat hitzaldiaren bidez. Bertan, "Topaguneak ildo sozialistaren baitan betetzen duen funtzioaren eta antolakuntza eredu berriaren inguruko gako nagusiak" azalduko dituzte hainbat kidek, ekimenaren inguruko argipen zehatzak emateaz gain. 19:00etan, ordea, kontzertua izango da Urbeltz pilotalekuan, Benito Lertxundiren eskutik.

Gonbidatu berezia

Argitaratutako azken diskoa, Ospakizun gauean, aurkeztuko du Lertxundik Legazpin, eta emanaldirako sarrerak eskuragarri daude jada. Sarrera fisikoak lau salmenta puntutan egongo dira; hain zuzen, Legazpiko Karibe Zaharra, Gurrutxaga eta Katilu tabernetan, eta Urretxuko (Gipuzkoa) Berit tabernan. Internet bidez ere erosi ahalko dira, entradium.com/events/benito-lertxundi-legazpi helbidean. Biak ala biak, 25 euroan daude salgai.

Otsailaren 9an bertan ere sarrera eskuratzeko aukera izango dute pilotalekura bertaratzen direnek, txarteldegian, 27 euroan.

Legazpin aurkezpena egin eta bi hilabetera izango da aurtengo Gazte Sozialisten Topagunea, apirilaren 9tik 13ra bitartean, GKSk eta IAk abenduan jakinarazi zutenez.