Ezkerreko zein eskuineko prentsa egurra ematen ari zaio txostena sinatu duen batzordeburu eta Frantzia Intsumisoko alderdikide Sophia Chikirou diputatuari. Le Monde egunkariak, esaterako, titularrera eraman du balorazioa: "Asanblada Nazionalean, Sophia Chikirousen txosten lotsagarria Txinari buruz".

Albisteak arrazoi du ondorengo lerroetan: Frantziako Gobernuarengandik oso urrun dagoen jarrera agertu du txostenak. Europari "biraketa estrategikoa" eskatu dio legebiltzarreko batzorde horrek. Are, oroitu du nola Txina "etsai sistematiko" gisa izendatu zuen Europako Batzordeak 2019an, eta bereziki ordutik, lankidetzarako aukerak itxita, estatukideen egonkortasun ekonomikoa kalteturik irten den. 

Txostenean azaltzen da Frantziak, askotan, "interes amankomun gehiago" izan ditzakeela Txinarekin Europako beste edozein estatukidek baino, eta, beraz, estrategiek horri gehiago begiratu beharko lieketela. Horrez aparte, Txina interesatuta legokeela uste dute. Izan ere, Frantzia lehenbizikotariko herrialdea izan zen Txinako Errepublika Popularra herri gisa aitortzen, eta hamarkadatan lankidetza ekonomiko ugari zabaldu zituzten bi herrialdeek. Hori guztia iraultzen hasi zen, txostenaren esanetan, Europako Batasuna ondo gorpuztu, egonkortu eta negozioak egitera Atlantikoaren bestaldera mugatzen hasi zenean; eta azken urteetan indartu egin da norabidea, txostengileen esanetan.

Txostenak iradokitzen du beste aldera mugitzeko tableroa. Europari egiten dio dei horretara, baina Frantziako Legebiltzarreko txosten bat izanik, legebiltzarra gobernuari eta Emmanuel Macron lehen ministroari zuzentzen zaie, haiek gero Europa mugiarazteko. Txostengileen esanetan, "etorkizunean lankidetzak abia ditzakete Frantziak eta Txinak, bientzat onuragarri izateko moduan, hala nola espazioaren arakatzean, ikerketa zientifikoan, unibertsitateetan eta trantsizio digitalean".