Frantziako armada Malitik ateratzen hasi da
Frantziako Gobernua Malin destinatutako soldaduak etxeratzen hasi da. François Hollande presidenteak esandakoa bete du, tropak apirilean herrialdea uzten hasiko zirela adierazi baitzuen. Ehun batek jada utzi du Mali, eta uztaila bitartean besteak etxeratuko dira. Hala ere, Frantziak mila soldadu inguru utziko ditu bertan, NBEko 11.200 kasko urdinekin eta 1.400 poliziarekin batera.
Soldaduak Frantziara itzuli arren, Maliko etorkizuna ez dago argi. Interbentzioaren ondorioz, 600 gerrilari eta 100 soldadu inguru hil dira. Defentsa Ministro Jean-Yves Le Drianen ustez, euren “konpromisoaren” azken fasean daude eta egonkortasuna lortzeko bidean dira.
Zerk bultzatu du gerra?
Bertsio ofizialaren arabera, islamista fanatikoak Malin indarra hartu eta hori gelditu beharrean ziren. Batzuen ustez, berriz, interbentzioa bertako baliabideak ustiatu ahal izateko egin zuten. Pello Zubiria gerraren arrazoiei buruz aritu zen astekarian, eta L'Obervatoire du nuclearie-ko presidente Stephane Lhommek, ARGIAn euskaratutako artikulu honetan, Frantziak herrialde afrikarrean dituen interesak aztertzen ditu. Batez ere, energia baliabideekin zerikusia dutenak.
