Nolatan TikTok?

Pertsona sortzailea naiz eta sormenari ematen diot lidergoa bertan. Zinemagintza ikasi nuen eta, beste gauza askoren artean, musikaria ere banaiz. Euskaltegian urtebete egin ondoren, TikToken euskarazko bideo bat argitaratzea erabaki nuen.

5.000 jarraitzaile dauzkazu, ez da makala.

Hala da. Lehendabiziko bideo hark atentzio handia bereganatu zuen eta, ordutik, nire euskal ibilbidearen lanketa sareetan partekatu izan dut. Gainera, hizkuntzak asko gustatzen zaizkit. Era batera edo bestera, TikToken nire bizitzako alde horiek guztiak jorratzeko aukera aurkitu nuen.

Egunero igotzen duzu zerbait?

Bai. Zuzeneko emanaldiak 22:00etan egiten ditut. Edozein gauzez hitz egiteko aukera daukat, ikusleek akatsak zuzentzen dizkidaten bitartean. Niretzat oso garrantzitsua da hori: egoa alde batera utzi eta euskaltzaleek nire hizkuntza zuzentzeko aukera izatea. Horrela ikasten dira hizkuntzak. Laguntza jasotzea ezinbestekoa da. Euskaltegia ere garrantzitsua da, jakina. Zuzenekoetan, baina, etengabe hitz egiten eta hizkuntza lantzen aritzen naiz. TikTok dut euskara ikasteko tresnarik onena.

Zergatik euskara bezain hizkuntza “txikia”-ri horrelako ahalegina eskaini?

Familiako misterio baten gisakoa dut euskara. Nire euskal loturaren berri izan nuenetik, euskara ikastearen bitartez, nire iraganean lo egon den erraldoi bat esnatzeko aukera izango banu bezala sentitu naiz.

Misterio horrek ekarri zaitu Euskal Herrira?

Bai. Duela hogei urte, Andaluzian bizi nintzela, Cadizko lagun batek esan zidan Zuñiga abizen euskalduna zela. Nik ez nekien “euskalduna” izatea zer zen, eta ikertzen hasi nintzen. Nolatan ez dut euskara bezalako hizkuntza eder eta misteriotsuaren berri izan orain arte? Halaxe pentsatu nuen. Euskal historia, hizkuntza eta kulturaren inguruan irakurtzen nuen heinean, gero eta gehiago maitemindu nintzen. Esango nuke nire bizitzako helbururik nagusiena noizbait euskara ikastea dela.

Nolakoa da euskara ikasteko zure prozesua?

Pixkanaka-pixkanaka ari naiz, denbora hartzen dut. Etengabe hitz egiten dut, lotsa alde batera uzteko gai naiz. Hori da nire superboterea. Bestalde, euskara altxorraren maparen erakoa da. Mapari begiratzen diodan bakoitzean, altxorrera gerturatzen nauten pista berriak aurkitzen ditut. Egun batean altxorrera iritsiko naiz. Oraingoz, asko disfrutatzen ari naiz eta berriz ere umea banintz bezala sentiarazten nau. Egunero zerbait berria ikasten dut nire altxorraren bila.

Zaila egiten al zaizu?

Hizkuntza bat ikasteak sakrifizio handia dakar, denbora eta lan asko eskaini behar baitzaio ikasteari. Nire ustez, hizkuntza ikasteko nahia eta arrazoia ulertzea da gakoa. Hizkuntza ikasteko arrazoi sendo bat duzunean errazagoa da beti ikasketa prozesuaz jabetzea. Baliteke hizkuntza bat ikastearen zailtasunak norberaren gogoen araberakoak izatea.

Hizkuntza mugak baldintzatzen zaitu?

Hizkuntza mugak hor daude, baina nik ez ditut sumatzen. Gainera, jendeak asko animatzen eta errazten dit nire eguneroko bizitza euskaraz egiteko. Gaztelania edo frantsesa bezalako hizkuntzak ikasten dituzunean inork ez zaitu bereziki animatuko, bai, ordea, euskara ikastean.

Nola erantzuten du jendeak estatubatuarra zarela eta euskaraz egiten duzula entzundakoan?

Galdera interesgarria da. Euskaraz entzuten didatenean asko harritzen dira. Bertako batzuk esan didate kanpotar bat euskaraz entzuteaz harro daudela. Jendea asko pozten da ni euskaraz entzuterakoan eta beti laguntzeko prest daude.

Hizkuntzaz gain, Euskal Herritik gustuko duzun beste zerbait?

Urtarrilean, Donostiako danborradan, negar malkotan hasi nintzen! Euskal Herrian komunitate batasunaren ideia eta sentimendua oso indartsuak dira. Estatu Batuetan ez da horrelakorik.

Euskara ikasi nahi dutenentzat aholkuren bat?

Beldurrik gabe hitz egitea. Barruan gordetzen baduzu, bertan hil daiteke.