“Indignatuta” daudela azaldu dute “Etxeko Baratza”-ko nekazariek. “Guk euskaraz ipini ditugu prezioak azokara iritsi ginenetik. Gure hizkuntza da eta egokiena horrela egitea dela uste dugu”. Euren Facebook kontuan azaldu dute pasa den ekainaren 9an gertatutakoa.

Legez etiketak gazteleraz jarri behar dituztela adierazi zien udal langileak. Eta nahi bada, euskaraz ere bai. Cadena Ser irratiak azaldu du kexa egun hartako aktan jaso zela baina ez dela zigorrik izango.

Elikagaien Etiketatze, Aurkezpen eta Publizitatearen Arau Orokorra erabili zuen ikuskatzaileak kexa jartzeko. Arau honen arabera Espainiako Estatuan merkaturatzen diren produktuen etiketak gazteleraz egon behar dira idatzita beti. Salbuespen bakarra beste hizkuntza ofizial bat duen lurraldean emango da, produktua bertan bakarrik komertzializatzen bada.