Ostegunean eman dute ekimen horien berri, Bilbon egindako agerraldian. Palestinarekin Elkartasuna plataformako ordezkariez gain, han izan dira Indar Gorri, Bultzada Txuriurdina, Herri Norte Taldea, Iñigo Cabacas Herri Harmaila, Iraultza 1921, Indar Horibeltz, Indar Baskonia, Armagiñak 1940 eta South Side zale taldeetako kideak ere.

"Euskal Selekzioaren partidak beti dira bereziak", adierazi dute. "Batetik, kirol-ekitaldi gisa, gure selekzioa jokatzen ikusteko aukera dugulako; eta bestetik, aldarrikapenerako egunak izan direlako historikoki". Gaineratu dute Euskal Herriko langileriaren "zapalkuntza soziala eta nazionala" salatzeko, ofizialtasuna aldarrikatzeko eta gainontzeko herri zapalduekiko elkartasun internazionalista adierazteko egunak izan ohi diela: "Aurten ere, aldarrikapen horiek bultzatuko ditugu kalean zein zelaian".

Aurtengo partida "are bereziagoa" izango dela diote, "Palestinako selekzioa aurrez aurre izateagatik, palestinar herria pairatzen ari den sarraskiaren erdian". Zaleen harmailek euskal selekzioaren ofizialtasuna aldarrikatzeko kalejira egin ohi dute hark jokatzen duenean, eta hala egingo dute hilaren 15ean ere bai, baina Areatzatik abiatuko den kalejira palestinar erresistentziari babesa adierazteko ere baliatuko dute.

Estadiora ere eramango dituzte euren aldarrikapenak, nahiz eta segurtasun-buruaren jarrera salatu duten, "jasandako zentsuragatik": "Ibaitik itsasora esaldia, amnistiaren ikurra eta palestinar erresistentziaren aldeko leloak hasieratik zentsuratuak izan zaizkigu", jakinarazi dute.

Herri Libreak martxa Arriagatik

Palestinarekin Elkartasuna plataformak eta zale taldeek antolatutako mobilizazioei gehitu behar zaie Gernika-Palestina, Gu ere bai! eta Gure Esku plataformek partidaren egunerako deitutako martxa. Herri Libreak. Euskal Herria-Palestina. Genozidioa STOP lelopean egingo da, 17:30ean Arriagatik abiatuta.