Emakumeak borrokan
Euskal Konfederazioa

"Izaera politikoa duen arazoa, politikoki konpondu behar da"

  • Seaskako Kolegioko ikasleek brebeta deitua egin berri dute, euskaraz egin ere. Zientzietako azterketak egin dituzte, euskaraz egiteko eskubidea aitortu ez arren. Kari horretara, iaz bezala, Hezkuntza Errektoretzak azterketen kopiak Bordelera eraman ditu “bahituta”.

ARGIA @argia
2019ko uztailaren 05a
Brebeta euskaraz egitearen aldeko protesta bilkura Donibane Lohizunen, kopiak Bordelera eraman ondorenean. (Argazkia: Bob Edme).

Hainbat irakaslek euren artezketak bahitu dituztelako, Donibane Lohizuneko Akademia Ikuskaritzaren ordezkaritzaren egoitzan protesta egin zuten. Era berean, Amaia Saez irakasleak salatu duenez, zientzietako azterketa frantsesez egin behar izatea “hautu politiko hutsa” da.

Kari horretara, Euskal Konfederazioak Frantziako Hezkuntzak euskararen bazterketa linguistikoa aplikatzen segitzen duela adierazi du ohar baten bidez. Hauxe bere funtsa:

Euskararen eta euskarazko irakaskuntzaren aldeko mobilizazioak biderkatu dira ikasturte amaieran: irakasleen greba maiatz hastapenean, elkarretaratzea Akademia Ikuskaritzako Donibane Lohizuneko egoitzaren aitzinean, Biarritzeko Danborrada, Donapaleuko elkarretaratzea eta bilkuraren trabatzea ekainaren 26an.  

Ondorioz, Seaskak 19,5 postu erdietsiko dituela eta murgiltze klaseak ondoko ikasturte sartzean irekiko direla Irisarrin eta Ainhoan.

Alabaina, “zenbat mobilizazio antolatu eta zenbat energia xahutu behar dira Estatuak berak izenpetu hitzarmena errespeta dezan (Seaskaren kasuan) edota zenbat irakasle eta guraso mobilizatu behar Akademia Ikuskaritzak aspaldi adostu murgiltze eredu klase horiek irekitzeko?”, galdetu du Euskal Konfederazioak.  

Euskal Elkargoko hautetsiek aho batez onartu dute euskarazko kalitatezko irakaskuntza. Eta urtero errepikatzen dira euskararen eta euskarazko irakaskuntzaren inguruko kezkak eta negoziaketak ikasturte berria prestatzerakoan: Gogorregia da urtero gisa berean aritu behar izatea".

Euskal Konfederazioaren erranetan, zerbait lortzea Frantziako Gobernuaren borondate politikoaren araberan dago: “Zentzu horretan argi dugu, aurtengo zailtasunak gaur egungo gobernuak erakutsi postura ideologikoari lotuak direla, pedagogia edo baliabide arazo bati baino”.

Herri Elkargoko hautetsiek aditzera eman dutenez: “Izaera politikoa duen arazoa, politikoki konpondu behar da”, adierazi du Euskal Konfederazioak.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Seaska

Seaska kanaletik interesatuko zaizu...
Azkenak
EGILEA
Eguneraketa berriak daude