Euskadiko Federazioak dio selekzioaren inguruko erabakia UEFA eta FIFAren kongresuek hartu beharko luketela
Pasa den uztailean, UEFAk jakinarazi zuen ez zuela Euskadiko Federazioa kide gisa onartuko, inor gutxi harritu zuen erabakia. Afiliazio-eskaera, baina, bi erakundeotako batzorde exekutiboek ukatu zuten, horretarako "eskumenik" ez dutenean, Euskadiko Futbol Federakundearen (EFF) hitzetan. Hori dela-eta, eskaera UEFAren eta FIFAren kongresuetara bidali behar dela adierazi du, "gaiari buruz erabaki dezaten".
Euskadiko Federazioak azaldu duenez, haren alegazioak onartuz gero, hautagaitza FIFA eta UEFAren kongresuetan defendatzeko aukera izango du. "2020ko abenduan, Euskadiko Futbol Federakundeak era formalean eskatu zien UEFAri eta FIFAri erakunde horietan afiliatzea", dio plazaratutako oharrean. "Eskaera hori UEFAren eta FIFAren Batzorde Exekutiboek, hurrenez hurren, 2021eko uztailaren 11n eta 31n emandako ebazpenek ukatu zuten. Hala ere, EFF-k uste du, nazioarteko erakunde bien estatutuen arabera, eskumenik ez zuten organoek eman zituztela ezezko ebazpenak. Horrela, aplikatu beharreko araudiaren arabera, gai horiek ezagutzeko eskumena bi erakunde horien kongresuei dagokie".
Aurrekari bi aipatu ditu Federazioak: "Iritzi bera eman du TASek [Kirolaren Arbitraje Auzitegia] bere CAS 2016/A/4787 eta CAS 2014/A/3776 ebazpenetan, hurrenez hurren, Jerseyko eta Gibraltargo futbol federazioek egindako afiliazio eskaerei dagokienez. Ebazpen horietan, TASek ebatzi zuen UEFAko zein FIFAko Batzorde Betearazleak ez duela eskumenik bere organismoetan afiliatzeko eskaera ukatzeko, eta eskaera UEFAren eta FIFAren kongresuetara bidali behar dela, gaiari buruz erabaki dezaten".
