ELEN sarean biltzen dira Europako hizkuntza gutxituetako 174 erakunde. Batzar Orokorrean, azken hilabeteotan Euskal Autonomia Erkidegoan izan den euskararen aurkako oldarraldia salatu dute. Aho batez babestu dute azaroaren 4an Bilbon egingo den manifestazioa.
Urriaren 7an, Sardiniako Casteddun herrian bildu dira ELEN Europako Hizkuntza Berdintasunerako Sareko 50 ordezkari, hizkuntza politiketako hainbat aditu eta akademiko. Sareak Europar Batasuneko 25 estatutan hitz egiten diren 50 hizkuntza eta 50 milioi hiztun ordezkatzen ditu. 174 erakunde daude, tartean Euskalgintzaren Kontseilua, azaroaren 4ko manifestazioaren antolatzailea.
Batzar Orokorrean, hizkuntza gutxituetako ordezkariek kezka azaldu dute Euskal Autonomia Erkidegoan, azken hilabeteetan, izan diren oldarraldi judizialen aurrean. Azpimarratu dute normalizazioaren aurkako oldarraldia ezaguna dela Ipar Euskal Herrian eta Nafarroako eremu batean, baina “azken hilabeteotan, berriz, euskararen kontrako oldarraldi judiziala euskara ofiziala den lurraldeetara ere hedatu da, ofizialtasuna zein normalizazio prozesua zalantzan jarriz”.
ELENek kritikatu duenez, azkenaldion hartzen ari diren erabakiak “elkarbizitzaren eta demokraziaren aurka doaz, eta hainbeste urtetan lortutako eskubideetan atzerapauso nabarmenak ekar ditzakete”.
Espainiako Gobernuari, eta batez ere Botere Judizialaren Kontseilu Nagusiari, eskatu diete neurriak har ditzaten, euskararen normalizazioaren aurkako oldarraldia amai dadin: “Berdintasun, justizia eta gizarte kohesio kontua da hau. Funtsean, eskubide zibilen kontua”.
Azaroaren 4ko manifestaziorako deia
Euskalgintzaren Kontseiluak azaroaren 4rako manifestazioa deitua du Bilbon, Oldarraldiaren aurrean: euskararekin bat, euskaraz bat lelopean. Hizkuntza gutxituen Europako sareak manifestazioarekin bat egin du: “ELENek pertsona eta erakunde guztiak animatzen ditu azaroaren 4an Bilbon egingo den protestan parte hartzera, lege honen aurka, baina batez ere euskararen normalizazioaren eta biziberritzearen alde, gainontzeko hizkuntza gutxitu guztienarekin batera”.
LABek ohartarazi du Gipuzkoako Foru Aldundiko behin-behineko 119 langileak egonkortzeko egin den bidea bertan behera gelditu daitekeela, hizkuntza eskakizuna ezarri izanagatik helegitea aurkeztu dutelako. LABek eta ELAk elkarretaratzea deitu dute otsailaren 16rako, Donostian.
Errenteria-Oreretako Aurrera tabernako zerbitzariak euskararekiko "mespretxuz" eta oldarkor erantzun zion euskaraz eskatu zuen bezero bati euskalgintzako hainbat kidek salatu dutenez.
Zizurko Udalaren obretako langile lanpostu baten euskarazko profila atzera bota du Iruñeko Administrazioarekiko Auzien 3. Epaitegiak. Erabaki horren aurka elkarretaratzera deitu dute hainbat eragilek. Hizkuntza Eskubideen Behatokiko zuzendari Agurne Gaubekaren aburuz,... [+]
Nafarroako Justizia Auzitegi Nagusiaren aurrean elkarretaratzea egin dute Zizur Nagusiko Udalaren aurka eman den azken epaia salatzeko. Udalak langile lanpostu batean ezarritako hizkuntza eskakizuna atzera bota du epaitegiak.