PPk eta Voxek eragin dute Auzitegi Nagusiaren galdera. Enplegu Publikoan euskara normalizatzea eragozteko helegitek jarriak zituzten eta EAEko Auzitegi Nagusia horiek aztertzen ari da. Prozesu horretan, Auzitegi Konstituzionalari iritzia eskatzeko aukera mahai gainean jarri du. Fiskaltzak ontzat hartu du Auzitegiaren proposamena. Euskal Enplegu Publikoaren Legearen 187.5 artikuluarekin daukate zalantza. Artikulu horrek administrazio publikoko lanpostu guztietan hizkuntza eskakizunak zehaztu behar direla jasotzen du.

Bengoetxea sailburua “harrituta eta kezkatuta”

Auzitegiak egindako iradokizuna ez-ohikotzat jo du. Lan Eskaintza Publiko zehatz batzuen inguruan egon diren sententziak gogorarazi ditu, “baina honek, beharbada, kolokan jartzen du gure marko juridiko osoa”. Erabaki honen aurrean kezka larria adierazi du, eta “jauzi larritzat” jo du egindako urratsa. Gobernuak alegazioa jarri duela azpimarratu du eta gehitu du Auzitegiaren proposamenak “ez daukala zentzurik” eta legea “guztiz konstituzionala” dela.

Euskara eskakizunen aurkako eraso etengabea

Euskararen aurkako ehun sententzia, bi urteko epean. Gehienak hizkuntza eskakizunen sistemari lotutakoak. Josu Aztiria legebiltzarkideak datu hori eman zuen Euskal Enplegu Publikoaren Legea aldatzeko EH Bilduk Legebiltzarrean lege proposamena aurkeztu zuenean. Enplegu publikoan euskararen normalizazioari etengabe jartzen ari zaizkien oztopoak geldiarazteko asmoz, EAJk eta EH Bilduk lege erreforma bana aurkeztuak dituzte.

Euskalgintzak eta hainbat sindikatuk urteak daramatzate erasoak salatzen eta lege babes handiagoa eskatzen. 2022ko irailean, EAEko sektore publikoaren euskalduntzeari 15 urteko epemuga jartzeko adostasuna aurkeztu zuten ELAk, LABek eta Kontseiluak.

Bi sindikatuek abenduaren 16rako eta 17rako mobilizazioak deitu dituzte, hurrenez hurren, Iruñean eta Gasteizen, Euskararik gabe, kalitatezko zerbitzu publikorik ez lelopean.