Espainiako Auzitegi Nazionalak CDRetako beste lau lagun ikertuko ditu, “terrorismo” akusaziopean
Ekainaren 30ean Instrukzioko 6. Epaitegiak deklaratzera deitu ditu iazko irailaren 23an Judas operaziotik ordu gutxira aske geratu ziren Clara Borrero eta David Budria, Alerta Solidària erakunde antierrepresiboaren arabera. Abendutik urtarrilera bitartean, zazpi atxilotuak fidantzapean aske geratu ziren.
La Directa hedabideak argitaratu duenez, Espainiako Auzitegi Nazionaleko Instrukzioko 6. Epaitegi Zentralak inputatu gisa deklaratzera deitu ditu lau pertsona, baita Clara Borrero eta David Budria ere; izan ere, 2019ko irailaren 23an Guardia Zibilak atxilotu eta handik ordu gutxitara karguekin aske geratu ziren inputatuok, epailearen aurretik pasa gabe. Ekainaren 30ean telematikoki deklaratu beharko dute.
Inputatu berrien defentsaz arduratuko den Alerta Solidàriak Sabadellen eman duen prentsaurrekoan azaldu duenez, Guardia Zibilak "jazarpenak" egiten jarraitu du irailaren 23tik aurrera. Errepresioaren aurkako kolektiboari dagokionez, gaur ezagutu diren zitazioek mahaigaineratzen dute Fiskaltza eta, beraz, Espainiako Gobernua “indar egiten ari" direla. Herri mobilizazioaren atzetik jarraika dabiltzala ohartarazi dute solidarioek, kasu honetan, mugimendu independentistaren aurka. Xavier Pellicer Alerta Solidàriaren abokatuaren ustez, azken albisteak agerian uzten du "terrorismoa Estatuarekin edozein disidentzia mota adierazten dutenen aurkako argudioa handia" dela.
