Apirilean Bilboko Errekaldeko Etxarri II gaztetxea hustean ari zirenean hainbat bizilagunek autogestionatutako gunearen aldeko mobilizazioa egin zuten eta Ertzaintzak foam jaurtigailuak erabili zituen pertsona hauek dispertsatzeko. "Aurrez aurre egin zidan tiro, barrabiletan apuntatuta, 30 metro baino gutxiagora". Horrela kontatu zuen Ertzaintzaren jaurtigailu baten ondorioz barrabila galdu zuen 33 urteko Iker Aranak. Zazpi hilabete ostean, ostegun goizean deklaratu du gaztea zauritu zuen ertzainak Bilboko epaitegian, Justizia Aranarentzat plataformak epaitegiaren parean kontzentrazioa egin du.

Plataformak prentsa ohar batean helarazi du beraien helburua etorkizunean antzeko beste kasurik ez gertatzea dela, eta hortaz, beharrezkoa ikusten dute erantzukizun guztiak argitzea. Era berean adierazi dute Ikerren kasuak mahai gainean jartzen duela ez dagoela bermatuta protestarako eskubidea, “ez da onargarria gaztetxe bati elkartasuna adierazteagatik Ikerri gertatu zitzaiona gertatzea”.  Era berean esan dute Ertzaintzaren "bortizkeria eta inpunitatea" agerikoa dela, adierazten duten moduan kasu honek eta azkenaldian izan diren beste batzuek.