Epaitegiak errugabetzat jo ditu apustu etxe baten aurkako kartelak jarri zituzten hiru andoaindarrak

  • Andoaingo apustu etxe baten jabeak salatu egin zituen hiru herritar negozio mota horien aurkako kartelak jartzeagatik, koakzioa leporatuta. Epaiketa egin zen maiatzaren 30ean, eta Tolosako epaitegiak deliturik ez dagoela ebatzi du.


2019ko ekainaren 11n - 11:09
Epaiketa dela eta asanblada irekia deitu zuten Andoainen. Argazkia: @JulenBegi

Apirilean Andoaingo bigarren apustu etxea zabaldu zuten Zumea plazan. Negozio mota horrekiko aurkakotasuna adierazi zuten hainbat herritarrek jarraian, aretoaren inguruan kartelak jarriz eta sare sozialetan zabalduz. Apirilaren 16an apustu etxearen jabeak salaketa aurkeztu zuen Ertzaintzan hiru andoaindarren aurka, salatuak bere “lan funtzio zilegien erabilera askea” oztopatzen ari zirelakoan. Maiatzaren 30ean egin zen epaiketa, eta Tolosako lehen auzialdiko eta instrukzioko 3 zenbakiko epaitegiak ebazpena eman berri du.

Gatazka soziala

Sententziak frogatutzat ematen du salatuek kartelak jarri zituztela herriko Zumea plazan eta inguruetan apirilaren 1ean eta 7an , “Apustu etxeak kanpora. Ez Andoainen ez inon” leloarekin. Epaitegiaren arabera, epaiketan salatzaile eta salatuen arteko gatazka agerian geratu zen, “ez dena ez pertsonala eta ez dagoena salatzaileari zuzenduta”. Sakoneko gatazka bestelakoa da sententziaren arabera: “Andoaingo herritarren kontrakotasuna ingurunean apustu etxeak ezartzeari”. Salatuek abiarazitako kanpainak “jokoaren gizarte arazoez kontzientziatzea” du helburu, eta horren baitan “apustu etxeekiko ondoeza” adierazten du.

Koakziorik ez

Sententziak koakzio delituak eskatzen dituen egitateak zerrendatzen ditu, horietako bat ere ez dela betetzen ebatziz. Batetik, koakzioak indarkeria eskatzen du, “fisikoa”, “morala” edo “gauzen aurkakoa”. Azken horren adibide bezala nabarmentzen ditu zerrailen aldatzea, sarbidea hesitzea edo aretoaren prezintatzea. Tolosako epaitegiaren arabera, kartelak jartzeak eta edukia sare sozialen bidez zabaltzeak ez du biolentziarik suposatzen. Koakzioak “emaitza materiala” eskatzen du ere, eta epaileak dioenez apustu etxearen jabeak ez du frogatu salatuek negozioaren jarduna oztopatu dutenik edo kanpainaren ondorioz etekinek behera egin dutenik. Azkenik eta Epaitegi Gorenaren irizpideak aintzat hartuta, koakzioaren helburu nagusia “inoren askatasuna mugatzea” izan behar duela azpimarratzen du sententziak. Aldiz, mezuen irakurketatik “sinpleki herrian negozio mota horien presentziarekiko desadostasuna” ondorioztatuko litzateke.

Salatzaileak errekurtsoa aurkezteko aukera du, bost eguneko epean eta epaitegi berdinean.

Pizten ari den kezka eta borroka

Apustu etxeen eta joko aretoen aurkako ekimenak eta protestak ugaldu egin dira azkenaldian Euskal Herrian. Eztabaida soziala zabaldu egin da. Herri askotan tokiko aretoen aurkako kanpainak zabaldu dira, Azpeitian, Andoainen eta Gasteizko Judimendi auzoan kasu. Eibar eta Athletic futbol taldeek apustu etxeekin akordioak sinatu izanak eztabaida piztu zuen iaz, eta Errealeko bazkideek galdeketan erabaki zuten taldeak apustu etxeekin kontraturik ez egitea. Ekainaren 23an apustu etxeen aurkako manifestazioa dago deituta Arabako hiriburuan.


Kanal honetatik interesatuko zaizu: Apustu etxeen gorakada
2023-02-08 | Jon Torner Zabala
Osasuna futbol taldeak akordioa egin du beste apustu etxe batekin

Letoniako Olybet apustu etxearen izena ez da Osasunako jokalarien kamisetetan agertuko, ezta, besteren artean, estadioko euskarri fisikoetan edo telebista-iragarkietan ere, jokoaren sektoreko enpresen publizitatea arautzeko Espainiako Gobernuak onartutako dekretua dela-eta.


2022-09-05 | ARGIA
Joko patologikoari aurre egiteko gida plazaratu du Jaurlaritzak

Joko arriskutsua goiz antzemateko eta prebenitzeko gidaliburua gazteei eta haien ingurukoei zuzendurik dago. "Jokoarekin lotutako arazoak edozein pertsonak izan ditzake, baina, bereziki, eurak dira kolektibo kaltebera", Eusko Jaurlaritzaren hitzetan.


2022-02-16 | Leire Artola Arin
Joko areto kopurua murriztuko dute eta horietara sarbidea kontrolatuta egon beharko da aurrerantzean

Indarrean sartu da Eusko Jaurlaritzak eginiko jokoaren lege berria EAEn. Aurrerantzean, apustu etxeek ikastetxeetatik gutxienez 150 metrora egon beharko dute, eta bi joko aretoren artean 500 metroko distantzia errespetatu beharko dute.


2021-10-28 | ARGIA
Jaurlaritzak jokoaren erregulazioa "gogortuko" du, "joko patologikoari aurrea hartzeko"

Lau ataletan sailka daitezkeen aldaketak egingo ditu datorren hiruhilekoan Eusko Jaurlaritzak jokoaren erregulazioan: aretoen arteko eta ikastetxeekiko distantziak mugatuko dira, baita areto kopurua ere, horietara sarbidea kontrolatuko da, eta publizitarearekin lotutako... [+]


Apusturako deia, langileen auzoetatik

Haritik Hirira lantaldeak agerian utzi du apustu etxeen eta horien kokalekuaren arteko harremana, auzo batzuen eta besteen arteko bereizketa nabarmenarekin; horiek mugatu eta arautzeko beharraz ohartarazi dute Asajer errehabilitazioan diren Arabako jokalarien elkartetik.


Eguneraketa berriak daude