Bizkaiko Emakumezko Enpresari eta Zuzendarien Elkarteak (AED) SPRI Taldearen laguntzarekin egin duen azterketa batek 50 langile edo gehiago dituzten Euskadiko zenbait sektore ekonomikotako 1.000 enpresa pribatu baino gehiago aztertu ditu, joan den azaroan. Azterketa horren emaitzaren arabera, administrazio-kontseiluetan emakumeen presentzia %19ra mugatzen da, eta %24k bakarrik betetzen dituzte zuzendaritza-postuak.

Administrazio-kontseilu eta zuzendaritza-karguetan etan %19 dira emakumeak

EAEko enpresetako zuzendaritza-karguetan eta administrazio-kontseiluetan ari diren bostetik bat besterik ez da emakumea (%19).

Enpresa txikietan (100 langile baino gutxiago), %17 da emakumea.

Enpresa ertainetan (250 langile arteko konpainiak), %18.

Enpresa handienek (250 langile baino gehiago) batezbestekoa igotzen dute, horien administrazio-kontseiluetan %22 emakumeak dira-eta.

Kontseilu horietako lehendakaritzari dagokionez, emakumeen batezbestekoa %13ra jaisten da:

%15 enpresa txikienetan (100 langile baino gutxiago)

%11 tamaina ertaineko enpresetan (250 langile arte)

%9 enpresa handienetan (250 langile baino gehiago)

Sektoreka, kontseiluetako emakumeen presentzia honako hau da:

Hezkuntza, %31

Merkataritza eta enpresa-zerbitzuak, %22

Eraikuntza, %19

Garraioak, %17

Industria, %15

Kontseiluetan emakumezko lehendakari gehien dituen sektorea eraikuntzarena da (%25), eta horren atzetik datoz enpresa-zerbitzuak (%19), merkataritza (%9) eta industria (%7).

Bost zuzendaritik bakarra emakumea

50 langile baino gehiagoko EAEko enpresetan zuzendaritza-postuetan ari diren emakumeen ehunekoa ere islatu du azterketak. Aztertutako 4.500 zuzendaritza-kargu baino gehiagotatik, %24 besterik ez dira emakumeak. Zehazki, CEO edo zuzendaritza nagusi postuak %9raino jaisten du datu hori.

Lan motaren arabera, gorabehera handia erakusten dute zifrek. Zehazki, zuzendaritza-postu batean emakume gehien dituztenak honako hauek dira:

Publizitate-zuzendaritza (%47)

Giza baliabideen zuzendaritza (%44)

Marketineko eta kalitateko zuzendaritza (%34)

Finantza-zuzendaritza (%33)

Erosketa-zuzendaritza (%32)

Inportazio-zuzendaritza (%21)

Esportazio-zuzendaritza (%18)

Informatika-zuzendaritza (%15)

Merkataritza-zuzendaritza (%14)

I+G zuzendaritza (%13)

Zuzendaritza teknikoa (%9)

Kudeatzailetza (%6)

Produkzio-zuzendaritza (%5)

Azterketa horretan ez dira sartu administrazioak eta enpresa publikoak eta kooperatibak.

Bizkaiko Emakumezko Enpresari eta Zuzendarien Elkarteak nabarmendu duenez, emakumea enpresa-munduan gero eta gehiago sartzea “ez dator bat erabaki-postuetako emakumeen presentziaren hazkundearekin”. Horregatik eskatzen du “ahalegin gehigarria” egin dadila. AEDk aitortzen du berdintasuna sustatzeko legeak eta politikak egin direla eta "horrek egoera hobetzen lagundu duela, baina ez da iristen legeak ezarritako ordezkagarritasun-kuotetara”. Txostenaren sarreran esaten denez, “emakumeek oztopoak gainditu behar dituzte beren lanbide-karreretan aurrera egiteko eta goi-zuzendaritzako postuetara edo erabaki-postuetara iristeko”.

Berdintasun planak enpresa handienetan ezarriz doaz, oso pixkanaka

Jaurlaritzako Lan eta Enplegu Sailak jakitera eman duenez, bihartik aurrera derrigorra izango da 50 langile baino gehiago dituzten Hego Euskal Herriko enpresetan berdintasun-planak ezartzea. 2020an 200 langile baino gehiago dituzten enpresek bete behar zuten baldintza hau eta 2021ean 100 langile baino gehiago dituztenen enpresek.

50-99 langile bitarteko 1.074 enpresak izango dute berdintasun planak ezartzeko betebeharra martxoaren 8tik aurrera. Handienak gehituz gero, guztira 1.998 enpresari eskatuko zaie plan hori izatea. EAEn dauden enpresen %1,31 dira, baina 462.822 langileri eragiten diete, langileen %50,89ri, Eustaten 2021eko urtarrilaren 1eko datuen arabera.

Gaur egun, Jaurlaritzako Lan eta Enplegu sailean 289 plan daude erregistratuta, eta 28 izapidetzen ari dira. Elena Pérez Barredo sailburuordeak onartu du kopuru hori ez datorrela bat EAEn dauden tamaina horretako enpresa kopuruarekin: "Badakigu hedatzeko zailtasunak daudela. Sentsibilizazio-faltako kasuak egoteaz gain, eta EAEtik kanpoko lantokiak izateagatik beren planak Ministerioan erregistratu dituztenak hemen ez agertzeaz gain, berdintasun-batzordeetako kideen prestakuntza- eta trebakuntza-falta ere badago". Hutsune horri aurre egiteko, genero-berdintasunari buruzko prestakuntza gizarte-eragileen bidez sustatu nahi dutela adierazi du.