Astelehen goizean argitu du Pedro Sánchez Espainiako presidente hautatu berriak zein izango den gobernu berriaren ministro taldea. Kopuru bera izango da, 22, baina lehen zeudenetatik hamarrek ez dute karguan jarraituko. Sumarrek bost ministerio izango ditu, eta gainontzeko guztiak PSOEk.

Nobedadeen artean, Iruñeko udal hauteskundeetan alkategai aurkeztu zen Elma Saiz dago, Nafarroako Gobernuko Ekonomia eta Ogasun kontseilari izandakoa duela gutxira arte. Gizarte Segurantzako ministro izendatu dute.

Fernando Grande-Marlaska, dagoeneko gobernuaren aurpegi ezaguna dena, Barne ministro izango da beste legegintzaldi batez.

Sumarren bost ministerioak

Yolanda Díazek bigarren presidenteorde izaten eta Lan eta Enplegu Ministerioa kudeatzen jarraituko du. Gainontzeko lauak berriak dira, eta Podemosekin lotura duena bakarra: Pablo Bustinduy. Bi ministerio bat eginda hartuko ditu bere gain, Ione Belarraren eta Alberto Garzonen lekuak, Eskubide Sozialen, Agenda 2030en eta Kontsumo Ministerioa.

Monica Garcia, Mas Madrideko diputatua, Osasun ministro berria izango da. Beraz, kartera hori PSOEtik Sumarrera lekualdatuko da. Bestalde, Sira Rego IUko eurodiputatuak ministerio berria hartuko du bere gain: Haurtzaroa eta Gazteria.

Azkenik, Ernest Urtasun En Comùren eurodiputatu eta Sumarren bozeramaileak Kultura Ministerioa gidatuko du.

PSOEren sei berriak

Industria arloko kontuak Jordi Hereu Bartzelonako alkate ohiak kudeatuko ditu aurrerantzean; Garraio Ministerioa, berriz, Valladolideko alkate ohi Óscar Puentek hartuko du; Berdintasun Ministerioa sozialisten eskuetara itzulita, Ana Redondo juristaren gidaritzapean; Erkidegoen Politika eta Memoria Demokratikoa, Ángel Víctor Torres Kanarietako presidente ohiak; eta, azkenik, Zientzia eta Unibertsitateak Ministerioa deiturikoa, Diana Morantek zuzenduko du.

Seigarren berria, esan bezala, Elma Saiz izango da.

Karguan jarraituko duten sozialistak

María Jesús Montero presidenteorde laugarrena izango da, eta Ogasun ministroa izaten jarraituko du. Nadia Calviñok karguan jarraituko du behin-behinean bederen, Europako Inbertsio Bankuko presidente izatetik gertu dagoela susmatzen delako. Bestalde, azken presidenteordeak, Teresa Riberak, karguari eutsi eta Trantsizio Ekologikorako ministro izaten jarraituko du.

Félix Bolaños, Presidentetzarako ministroa izateaz harago, Justizia ministroa ere izango da. Grande-Marlaskak Barne Ministro izaten jarraituko du, Margarita Robles Defentsa ministro, José Manuel Albares Kanpoko Gaietarako ministro eta Isabel Rodríguezek Etxebizitza Ministerioa hartuko du, eta bozeramaile izateari utzi. Bere ordez, Pilar Alegria Hezkuntza eta Kirol ministroak hartuko du bozeramaile kargua. Azkenik, José Luis Escrivák Gizarte Segurantzako kargua utzita, Eraldaketa Digitalerako Ministerio berria kudeatuko du.