Ostegun honetan beteko dira 50 urte Franko diktadorea ohean hil zenetik. Frankismoa ez zela hil eta berriro ere eskubide eta askatasunak mehatxatzen dituela ohartarazi du Oscar Matutek igandean Bizkaiko hiriburuan eginiko prentsaurrekoan. Horren aurrean, azaroaren 22an manifestazioa egingo du EH Bilduk, Bilbon.

Euskal Herriak "faxismoari beti aurre egin" diola azpimarratu du. Eskuin muturraren aurrean beharrezko ikusi du Matutek "ekidistantzian ez gelditzea" eta are gutxiago presio erreakzionarioei eta xenofoboei men egitea. Mobilizaziora deitu ditu “herri klasea eta herri honetako feminista, langile, euskaltzale, gazte eta adinekoak”, faxismoari “herri duina dagoela eta ez direla pasako” esateko.

“Dozenaka milaka” pertsona biltzea espero dituela adierazi du EH Bilduko idazkari nagusi Arnaldo Otegik  ETBko Egun on saioan, astelehen goizean. Manifestazioa ez dela bakarrik "herri honen historia gogoratzeko beharrezkoa", aitzitik, "etorkizunari begirada bat" dela adierazi du. Fusilatuen senide batzuk, manifestazioan egongo direla aurreratu du. Modu horretan, senideei babesa eman beharra dagoela adierazi du. Era berean, EH Bilduk faxismoari eta autoritarismoari aurre egiteko bere eredua zein den frogatu nahi du, era “zabal, baketsu, demokratiko, diziplinatu eta kolektibo batean".