Iriarteren esanetan, hobekuntzarako zirrikitu bat ikusi dute eta saiatuko dira baliatzen. Azken asteetan negoziatzen ari dira Pedro Aspiazu Ogasun sailburua eta EH Bilduk izendatutako taldea –Maddalen Iriarte bera, Nerea Kortajarena legebiltzar taldeko koordinatzaileak, Pello Otxandiano EH Bilduko programa zuzendaria eta Unai Urruzuno EH Bilduko koordinatzaile nagusiaren ondokoa–.

Negoziazioen ondoren, EH Bilduk astean erabaki du ez duela osoko zuzenketarik bideratuko, eremu politikoan akordiorik ez badago ere, alor ekonomikoan aukera interesgarriak ikusten dituelako. Naiz-ek hilaren 17an iragarri zuenez, EH Bilduk 118 milioiko proposamen bat egin zion Aspiazuri larrialdi klimatikoa, gizarte politika, erresidentziak eta gazteen alorretara bideratzeko. Jeltzaleak eskaintza murriztu eta 72 milioiko aukera batekin ihardetsi zion. Iker Rioja kazetariak El Diario-n dioenez, 90 milioiko funtsa kudeatzeko aukera ere izango luke EH Bilduk.

Alde biek iragarri dutenez, datozen egunetan jarraituko dute negoziazioekin. Orain arte aurrekontuak onartzeko erakutsitako erabateko oposizioa bertan behera utzi du ezkerreko indarrak eta Jaurlaritzarekin akordioak lortzeko ateak ireki ditu. Espainiako Gobernuaren eta Nafarroako Gobernuaren aurrekontuak onartu zituen 2021ean EH Bilduk, eta iragarri duenez, berdin egingo du Iruñea eta Madrilgo gobernuen 2022ko aurrekontuekin.

Eusko Legebiltzarreko gainerako indar politikoek, Elkarrekin Podemos, PP-C’s-ek eta Voxek osoko zuzenketak aurkeztuko dituztela iragarri dute. Urkullu lehendakariak eskertu egin du EH Bilduren jarrera eta aurrera begira akordioetarako atea irekita dagoela adierazi du.