ARGIA.eus

2021eko apirilaren 21a

EAEko herritarrek uste dute okerrago daramatela konfinamendua zaharrek umeek baino

  • Eusko Jaurlaritzak 18 urtez gorako 750 pertsonari egin dio galdeketa eta argitaratu ditu emaitzak. Arreta deitu diguten erantzunak laburtu ditugu jarraian. Adibidez, herritarrek kezka handiagoa dutela EAEko ekonomiagatik beren etxekoagatik baino eta lurraldearen ekonomia urtetarako ahulduko dela uste izan arren, beren egoera ekonomiko pertsonala hurrengo urtean ez dela askorik aldatuko erantzun dutela.

ARGIA @argia
2020ko maiatzaren 07a

Eusko Jaurlaritzak Euskadiko herritarrak COVID-19ren aurrean inkestaren emaitzak argitaratu ditu maiatzaren 6an. Lehendakaritzako Prospekzio Soziologikoen Kabineteak burutu du inkesta, eta EAEko 18 urtez gorako 750 pertsonari egin diote galdeketa, apirilaren 27tik 29ra.

Nafarroako Gobernuak bezperan aurkeztu du koronabirusak nafarren osasun fisiko eta emozionalean izan duen eraginari buruzko inkesten emaitza, eta nabarmen lagin handiagoa erabili du horretarako: Nafarroako 18 urtez gorako 1.200 pertsonari egin diote galdeketa, lau alditan, apirileko aste bakoitzean 300 pertsona elkarrizketatuz.

Hauek dira Jaurlaritzaren inkestaren emaitzetan deigarri egin zaizkigun hainbat puntu:

Ingurukoengatik kezkatuago, norberagatik baino

Galdekatutako herritarrek kezka handiagoa izan dute ingurukoak gaixotzeko, beraiek gaixotzeko baino: ingurukoak gaixotzeko kezka nahiko eta asko %91k adierazi du (asko %59, nahiko %32); aldiz, norbera gaixotzeko kezka nahiko eta asko %71k (nahiko %38 eta asko %33).

Adinekoen egoera kezkagarriagoa, umeena baino

Umeen eskubideen aldeko mugimendu espontaneoak indarra hartu du konfinamenduan zehar, eta umeek egunero paseatzera ateratzeko aukera izatea lortu du. Ez da horrelako mugimendu eta lorpenik garatu zaharren egoeraren aurrean. Agian erantzunetan eragina izan dezake galdeketa egin zen egunetan, umeek kalera ateratzeko aukera lortu berri zutela? Emandako erantzunetan, behintzat, zaharrenganako kezka handiagoa adierazi dute:

Haurrek konfinamendua ondo eta nahiko ondo daramatela uste dutela erantzun du %87k eta nahiko gaizkitik oso gaizkira %10ak. Zaharren kasuan, konfinamendua ondo eta nahiko ondo daramatela uste dutela erantzun du %71k eta nahiko gaizkitik oso gaizkira %26k.

Umeek paseatzeko baimenari buruz, %57k erantzun du baimena bere horretan ongi dagoela, %23k ez litzatekeela hain "permisiboa" izan behar, %9k ez litzaiekeela etxetik ateratzen utzi behar, eta %8k "permisiboagoa" izan beharko lukeela baimen horrek. Arreta deitzen du, justu jende zaharrena dela (65 urtetik gorakoak) umeen irteteko eskubide hau ondoen ikusi dutenak, edo "permisiboago" jokatu behar dela erantzun dutenak.

Baina umeen paseatzeko baimenak baino atxikimendu handiagoa du galdeketa erantzun dutenen artean zaharrek ariketa fisikoa egitera ateratzeko balizko baimenak (agian umeena lortuta zegoelako eta zaharrena oraindik ez, galdeketa egiteko momentuan): %66k erantzun du adineko pertsona guztiei eman beharko litzaiekela baimen hori, eta %13k dio ezetz. Tartekoek, adinaren arabera emango lukete baimena (65 urtetik beherakoei %10ak eta 65 urtetik gorakoei %8ak). Kasu honetan ere zaharrenak dira baimen honen aldeko defentsa handiena egiten dutenak, eta adina zenbat eta gehiago jaitsi, orduan eta gutxiagok egiten du bat zaharren ariketa fisikorako baimenaren eskaerarekin.

EAEko ekonomiak sufrituko du, baina gure etxeak ez

Erantzun dutenen %97k kezka nahiko eta handia adierazi dute EAEko ekonomian izango dituen ondorioengatik (asko %61 eta nahiko %36). Erantzun hori eman dutenen aldetik, bitxia egiten da lurraldeko ekonomian duten kezka ez beren etxeko ekonomian sentitzea: %80k adierazi du kezka nahiko eta handia (%43k asko, %37k nahiko).

Zentzu berean, galdekatutako %70ak EAEko ekonomia urte batzutarako ahulduta geratuko dela erantzun du. %9k erantzun du oso ondatuta geratuko dela urte askotarako, eta %19k soilik erantzun du azkar errekuperatzea espero duela.

Aldiz, lurraldearen ekonomiari egiten dioten irudikapen hori ez dator bat beren burua hurrengo urtean zer egoeratan egongo den aurreikusterakoan: %39k erantzun du bere egoera ez dela aldatuko; %29 erantzun du pixka bat okertuko dela eta %15ek erantzun du oraingoa baino pixka bat hobea izango dela.

Sei alor hauei buruzko galderak egin dizkie Jaurlaritzak herritarrei

Guztira 32 galdera egin dituzte, eremu hauei buruzkoak: koronabirusagatiko kezka, aurre egiteko neurriak, konfinamendua, osasun krisiaren kudeaketa, izango dituen ondorio ekonomikoak eta izango dituen ondorioak baloreetan.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Covid-19 shockean adi  |  Eusko Jaurlaritza  |  EAE  |  Zahartzaroa

Covid-19 shockean adi kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude