Idazle iheslariaren kasua hurbiletik jarraitzen duen Lundi Matin aldizkari elektronikoak zabaldu duenez, Italiako agintariek Cesare Battisti Kalabriako Rossano espetxean zeukaten isolaturik, Jihad islamikoaren aldeko presoen artean, eta ekainaren 26an onartu dute handik aterata eramatea Ferrarako presondegira, Italiako iparraldean. Azken honetan ez diote oraindik kendu AS2 segurtasun goreneko erregimena, baina gutxienez leundu diote tratua eta Rossanokoan nozitzen zuen isolamendu totala arindu diote.

Battistik bere ekintzak eragin duen zalapartarekin lortu du, gutxienez, berriro eztabaidan egotea 1970eko militante ezkertiar armatuen kontrako errepresioa, bera baita oraindik espetxe zigor luzeak kunplitzen ari diren preso gehiagoren arteko ezagunena. Battistik bizi osorako zigorra dauka ezarrita, baina ez AS2 segurtasun gorenekoan bete beharra. Bere kasua bideratzeko lehen urrats moduan isolamendu hori kentzea da Battistik eskatzen duena hasieratik.

Ekainaren 9an hasitako gose greba bitartean Battisti bisitatu dutenetako bat izan da Alderdi Demokratikoko diputatu Enza Bosio eta honek ministroari eskatua zion presoaren lekualdatzea, zigorra betetzea eta mendekua bi gauza direla oroitaraziz. Battisti Ferrara eraman zutela jakindakoan esan zuen: "Poza ematen dit, baina orain nire itxaropena da Ferraran onartuko diotela erregimen arruntaren bizi baldintza duinetan egotea". Cesare Battistik berak ezin izan die, orain arte, bere iritzirik jakinarazi senide eta lagunei.

Cesare Battisti idazleak, 1980ko hamarkadatik Italiatik erbesteratutako militanteen artean ezagunena bera, 40 urte egin ditu atzerrian, Frantzian lehenik, Brasilen gero eta Bolivian azkena, herrialde honetan Evo Moralesek Italiako gobernuari entregatu zion arte 2019ko urtarrilean. Italian AS2 espetxe erregimen oso gogorra ezarrita, hau kendu arte amore ez zuela emango adierazi zuen ekainaren 9an, despedida tonuan familiari eta lagunei igorritako gutunean.