Gara egunkariak Bizkaiko, Gipuzkoako eta Nafarroako azken datuak jaso ditu. Horien arabera, bigarren olatuan Bizkaian 37 egoiliar hil dira eta 116 gaixo daude momentu honetan. Horietatik 23 erietxean daude. Azken bi egunetan zortzi erabiltzaile ospitaleratu dituzte. Ondoko udalerrietakoak dira gaixotutako gehienak: Zamudio, Barrika, Bilbo, Sestao, Mungia, Getxo, Bakio eta Elorrio. Mungiako San Jose-Etxe Alai eta Bilboko DomusVI Miraflores egoitzak dira kaltetuenak. Bakoitzean hogeina kutsatu izan dira.

Birjinetxe egoitza gaixoak jasotzeko prestatu zuten lehenengo olatuan eta orain ere egiteko bera du. COVID-19ak kutsatutako 56 egoiliar daude une honetan. Bizkaiko Foru Aldundiak adierazi du Birjinetxe egoitzan dauden gaixoak eta gainerako egoitzetakoak kontuan hartuta, 195 kutsatu daudela uneotan. Zahar egoitzei dagokienez, Euskal Herriko herrialderik kaltetuena da Bizkaia.

Irailaren 19an, Pentsiodunen Mugimenduak eta Babestu Bizkaia egoiliarren senideen elkarteak protesta egingo dute Bilbon. Plaza Biribiletik eta Eliptikotik abiatuko dira lau zutabetan eta Foru Aldundiaren egoitzara iritsiko dira. 12:00etan izango da protesta.

Gipuzkoan bost hildako bigarren olatuan

Bigarren olatuan 61 egoiliar gaixotu dira. Donostiako bi egoitzatan, Errenteriako batean eta Hernaniko beste batean bizi dira. 61 horietatik hamabi erietxeetan daude eta 35 Eibarko Ospitaleko unitate berezian. Abuztuaren 11tik bost pertsona hil dira birusak eraginda.

Irailaren 12an Eskoriatzan protesta egin zuten Gipuzkoako Senideak elkarteak, Pentsiodunen Elkarteak, Irauli Zaintza elkarteak eta hainbat sindikatuk. Egun osoko protestei ondoko izenburua jarri zieten: Sos erresidentziak: zaintza erdigunean".

Nafarroan hiru adineko

Naiz.eus-ek jasotako informazioaren arabera, Nafarroako Gobernuak ez du zehaztu etxean edo zahar egoitzatan bizi ziren, baina jakinarazi du adineko hiru pertsona gehiago hil direla.