Ontziolako langileek hilabeteak daramatzate enpresaren egoera larriaz kezkatuta eta lan karga eske mobilizatzen. Manifestazioak, itxialdiak eta hainbat adierazpen publiko egin dituzte, baina egoerak atzera bueltarik gabea ematen zuen martxoan 200 langileri eragiten zien Enplegu Erregulazio Espedientea onartu zenean.

Herbehereetako Royal N.V. Texels Eigen Stoomboot Onderneming (TESO) enpresarekin adostutakoari esker ordea, bi urterako arnasa izango du Bizkaiko ontziolak. 1.750 lagun eta 350 ibilgailu garraiatzeko moduko itsasontzia eraikitzeko eskatu diote La Navali eta hura eraikitzeko 600.000 orduko lana beharko dela aurreikusi dute. Naiz.info-n irakur daitekeenez, “konpetentzia estua” egon da ferrya zein enpresak eraikiko erabaki bitartean ontziola europarren artean.

Agerkari berak jaso du lagileak ordezkatzen dituen enpresa batzordearen iritzia. Haien arabera, albistea ona da, baina ez behar bezainbeste. Ontziolaren jarduera falta hein batean konponduko duela uste dute, baina ez duela ziurtatzen langile guztientzat beharra egongo denik.