Azaroaren 10ean jakinarazi zuten Hernaniko Langile Ikastolako gurasoek har bat aurkitu zutela haurrei zerbitzatutako janarian, eta Lakuako Hezkuntza Sailari zerbitzuaz arduratzen den Serunion enpresarekin kontratua eten zezala eskatu zioten, emandako janariaren “kalitate txarragatik”. Gogorarazi zuten haur askorentzat jangela zerbitzua “aukera bakarra” dela, eta premiazkoa dela “kalitatezkoa eta osasuntsua” den zerbitzua eskaintzea.

Ordutik Langile ikastolako familiekin eta zuzendaritzarekin “zuzeneko eta etengabeko harremana” izan duela jakinarazi du Hernaniko Udalak, “uneoro udal bitartekoak ikastolako mankomunitatearen eskura jarriz”. Adierazi du nahiz eta eskola jantokiak Eusko Jaurlaritzako Hezkuntza Sailaren mendeko izan, Hernaniko Udalarentzako ere “kezka iturri” dela herriko ikastetxeetan halako gertakariak izatea.

Hori dela eta, jantoki ereduen inguruko lanketa egiteko “prest” azaldu da Udala, eta dagoeneko eman ditu lehen urratsak. Hala, herriko ikastetxe eta ikasle guztientzako bestelako jantoki eredu bat eta horren bideragarritasuna posible ote litzatekeen aztertuko dute, Hernaniko ikastetxe bakoitzeko guraso ordezkaritzekin elkarlanean.