ARGIA.eus

2020ko maiatzaren 26a
Emakumeen Mundu Martxaren ekitaldiak

Bangladesheko arropa fabrikan hildako emakumeak gogoan

  • 1.130 lagun hil ziren Bangladesheko Dhakan hiriburuan, eraikina erorita, 2013ko apirilaren 24an. Erdiak baino gehiago emakumeak ziren, eta besteak beste, Benetton, Mango, Inditex eta El Corte Ingles arropa markentzat jantziak egiten zituzten, lan baldintza gogorretan. Emakumeen Mundu Martxak ekitaldiak antolatu ditu bigarren urteurrenean.

ARGIA @argia
2015eko apirilaren 24a
Eraikinean zauritutakoak eta hildakoen senideak kalte-ordainak eskatzen. Argazkia: 2014 GMB Akash / Panos

Multinazional horiek biktimentzako adostutako kalte-ordainetatik 6 milioi dolar ez dituztela eman oraindik salatu du hainbat eragilek.

Munduko hainbat herrialdetan gogoratuko da duela bi urte Bangladeshen gertatutakoa, Mundu Martxako plataformen bidez. Euskal Herrian, Bilbon, Donostian, Iruñean eta Gasteizen egingo dira ekitaldiak.

Bi helburu dituzte ekimenok. Batetik, Emakumeen Mundu Martxak salatu nahi du sistema kapitalista patriarkalak emakumeen lan produktiboa nola gutxiesten duen. Bestetik, 2013ko apirilaren 24an Rana Plaza eraikina erorita hil ziren 1.130 pertsonak eta 2.000tik gora zaurituak gogoratu nahi dituzte. Tartean emakume langileen haurrak zeuden, eraikineko haurtzaindegian edukitzen baitzituzten. Zortzi solairuko eraikinean lau arropa fabrika, bankua eta dendak zeuden.

Emakumeen Mundu Martxaren ustez,  arropa fabriketako langileek (ia denak emakumeak) lan baldintza gogorretan egiten dute lan; 14 orduko lanaldiak dituzte, soldata oso baxuak, eta gutxieneko segurtasuna betetzen ez duten eraikinetan egiten dute lan.

Bangladeshen arropa fabrika ugari dago, eta urtean ehunka lagun hiltzen da eraikinetan izandako suteetan, eta fabrikok erorita hilda.

Bangladesheko arropa fabriketan lanean ari diren emakume langileen egoeraz gehiago jakin nahi izanez gero Bangladesheko arropa merkeak sarraskiz sarraski erreportajea irakur dezakezu.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Feminismoa  |  Langile borroka  |  Bangladesh

Feminismoa kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude